EKHCA 4th District League T20: Jop suk ka Cricket Lovers ïa ka Laitkynsew, khyrwit spah ron u Shavian

Sohra, Rymphang 10: U Shavian Blah u la khyrwit palat ïa ka spah ron (centuri) ban btin lynti ïa ka Cricket Lovers sha ka jingjop pyrshah ïa ka Laitkynsew CC haka 4th District League T20 Cricket Tournament 2024 ba la pynlong da ka East Khasi Hills Cricket Association [EKHCA] ha Sohra, hynne ka sngi Nyngkong.
Ha kane ka jingïalehkai ka Cricket Lovers ka la jop suk da 181 ron bad ka jingïaroh ka long sha u Shavian uba la kamai 121 ron ha ka tied.
Hadien ba jop ïa ka toss ka Cricket Lovers ka la shimti ban tied nyngkong bad lyngba u Shavian Blah (121 ron naki 51 bol) ka kynhun ka la lah ban kynjoh haduh 275 ron naki 20 ober ba la mang bad khyllem 6 wiket. U Kesper Malngiang u la khur 2/47 naki 3 ober na ka liang ki rangkawang bol ka liang pyrshah.
Haba pyrshang beh ïa ka thong baroh 10 ngut ki nongtied jong ka Laitkynsew CC ki la khyllem noh tang na bynta 94 ron naki 19.4 ober, u Kesper Malngiang u la kamai 38 ron naki 47 bol hynrei ka kynhun ka dang jngai ban poi sha ka thong.
Na ka liang ki rangkawang bol u Raj Kishor Yadav (khur 3/1 naki 2 ober) u la long uba seisoh tam ha ka bol na bynta ka Cricket Lovers hynrei ïa ka Player of The Match la khur da u Shavian Blah.