Shillong, Rymphang 10: Ka Ryntih FC ka la ïoh ban khur ïa ka jingjop kaba la donkam bha da kaba pynliem ïa ka Nongthymmai SC da 4-1 kol ha ka OC Blue Shillong Premier League 2024 ha madan First Ground – SSA Stadium, Polo, ha ka sngi Nyngkong ban pynkut noh ïa ka jingshah rem ba 11 sien lynter jong ka. Shuwa kane ka Shillong Lajong FC ka la pynjemkhnap ïa ka Laitkor SC da 6-0 ha ka jingïalehkai kaba la long ha ka por mynstep.
Haba phaidien ka Ryntih ka ladep pynliem ïa ka Nongthymmai da 3-0 kol ha ka jingïakhun 1st leg ha ka 17 tarik Risaw bad nangta ka la ïaid shakhmat ban shah rem haduh 11 sien lynter ha ki jingïalehkai kiba bud. Mynta ka sngi, u Wanshanlang Dkhar (53’P, 82’) bad u Andy Mawthoh (57’, 68’) ki la ïoh ban pynkhihjar mar ar sien na bynta ka Ryntih, katba u Mowell Chyne (79’) u la pynphai ïa ka shi kol na bynta ka Nongthymmai.
Kham hashwa, ka Lajong ka la trei borbah ban pynjemkhnap ïa ka Laitkor lyngba ki kol na u Yohaan Benjamin (8’), Deibormame Tongper (64’), Iohborlang L Lyngkhoi (83’P), Emanbha Marbaniang (86’) bad u Babysunday Marngar (90’+4P). Ka la don ruh ka kol kaba la thep hi (own goal) da u Batskhembor Nongkynrih, rangïalehkai ka Laitkor ha ka minit kaba 59.
Da kane ka namjop ka Lajong ka la kiew sha ka kyrdan ba ha khlieh duh ha ka miej. Baroh lai, ka Lajong, Mawlai SC bad ka Rangdajied United FC ki la kamai mar 29 point hynrei ka Rangdajied ka wan ba lai namar ka don ïa ka rekod kaba sniew tam hapdeng kine ki lai kynhun (head-to-head). Katba ïa ka Mawlai bad ka Lajong ym lah satia ban pynïakhlad naba ki la ïakhaid ha ka por ba ki ïakynduh pyrshah, hynrei ka Lajong ka don ka jingïapher kol (goal difference) kaba kham bha (+29 la +21). Hynrei ka Mawlai ka lah ban knieh biang ïa ka kyrdan ba ha khlieh duh lada ka jop ne ïakhaid mynta ka sngi pyrshah ïa ka Nangkiew Irat SC.
Ha kawei pat ka liang ka jingjop jong ka Ryntih kam shym la wanrah jingkylla ïa ka kyrdan ha kaba ka dang ïaineh sha trai duh jong ka miej kamai poiñ. Ki la kyntiew pat ïa ka point jong ki sha ka 6 hynrei ki dang shah tam 2 point ha ka Nongthymmai. Hynrei ka namrem ka la nang ban khia shuh ïa ka Nongthymmai ban lait na ka thup shah pynhiar kyrdan (relegation zone).
Kin don biang ar tylli ki jingïalehkai mynta ka sngi ha kaba ka Sawmer SC kan ïakhun pyrshah ïa ka Nongrim Hills SC ha ka por 11 baje mynstep, bud sa ka Mawlai pyrshah ïa ka Nangkiew Irat ha ka por 2 shiteng mynsngi.
