Sangah ka KSU ïa ka Sorkar Meghalaya bym ïalam ïa ki lad pathai khubor sha Umkiang

Khliehriat, Naitung, 16: Ka Khasi Students Union (KSU) Narpuh Circle, ka la pynrem jur bad sangah tyngeh ïa ka Sorkar Meghalaya ka bym shym la ïalam ïa ki lad pathai khubor jong ka jylla ha ka jingïakren pynbeit pud jong ka Regional Committee na ka bynta ka Jaiñtia Hills na ka Jylla Meghalaya bad na ka jylla Assam kaba la long ha ka sngi Saitjaiñ ha ka shnong Umkiang, East Jaiñtia Hills District.
Ïa ka Regional Committee na ka Jylla Meghalaya la lamkhmat da u Chairman u Bah Sniawbhalang Dhar, uba long ruh u Symbud Myntri Rangbah ka Jylla ryngkat ka jingdonlang jong ka MLA ka Saipung Constituency ka Kong Santa Mary Shylla, u Chief Executive Member (CEM) ka Jaiñtia Hills Autonomous District Council (JHADC) u Bah Thombor Shiwat katba na ka Assam la lamkhmat da u Myntri ka tnat Forest u Chandra Mohan Patowary uba dei u MLA ka Dharmapur Constituency.
“Balei ka Sorkar Jylla kam shym la ïalam ïa ki lad pathai khubor na ka jylla Meghalaya, la ki dei ki nongthoh khubor jong ka sorkar (tnat Information & Public Relations) lane ki nongthoh khubor bapher bapher, katba na ka liang ki nongmihkhmat na Assam ki la wan lang bad ki lad pathai khubor naduh Guahati,” la ong u President KSU Narpuh Circle u Bah K.S.Suchiang.
“Kat ka jingïakren ban ïa pynbeit ïa u pud u sam ka long kaba sngewlyngngoh shisha ba ka Sorkar Meghalaya ka la leh klet khlem da khot ïa ki lad pathai khubor kiba na ka jylla. Kane ka long shisha ka jinglehraiñ bad ka buh ïa ngi ha ka jinglyngngoh namarba ïa ka jingïakren pynbeit pud la pynlong hapoh u pud u sam jong ka jylla Meghalaya ha Holi Cross Higher Secondary School ha Umkiang,” ong u nongïalam ka KSU bad bynrap, “katba ki lad pathai khubor ki wan na ka jylla Assam hynrei na ka jylla la jong pat ym don nonglumkhubor. Ka jingkylli kaba mih, shaei ki jah ki lad pathai khubor jong ngi bad balei ka Sorkar ka khlem khot ïa ki nonglum khubor ba kin ïadon bynta lang ha ka jingïakynduh lang ha Umkiang ban sakhi ïa ka jingïakren pynbeit pud hapdeng ka jylla Asam bad Meghalayaï”
“Kane ka jingleh jong ka Sorkar Jylla ka la pynsuba jur ïa ka seng bad ïa ki paidbah ruh kumjuh ba imat ka don kaei re kaei sha lyndet. Lada ka long ha kane ka dur ki paidbah kin ym lah ban shaniah ïa ka jingïakren pynbeit pud kaba shu leh sopsop khlem da khot lang ïa ki nonglum khubor jong ka jylla ka jong ngi,” la kynthoh u Bah Suchiang.
“Haba nga la kren ïa u Waheh Shnong jong ka shnong Ratacherra u Bah P.Dhar lyngba ka telephone, u la ïathuh ba ka long shisha ka jinglehraiñ namar haba ki nongihkhmat kiba na Assam ki wan na ki kali, ki nongthoh khubor jong ka Assam ki la ap lypa bad ki la shon dur bad ring dur, katno ka long kaba iphuh iphieng ka long ka jingshngaiñ bad kaba itynnad, katba na ka jylla Meghalaya jlang ym don wat tang uwei ruh u nonglum khubor kiba ban leh ïa ka kam. Kane ka long shisha ka jinglehraiñ, hato dei ki nongthoh khubor na Assam bad dei kito kiba na Assam seh ki ban tuklar ban mushlia ïa kane ka khyndew ka shyiap jong ngi? Hato ki lad pathai khubor kiba na kane ka jylla kim lah seh ban tuklar ban mushlia ïa kane? Ïa kane ka jingleh lyndet jong ka Sorkar Jylla ïa ki nonglum khubor ngin nym lah ban pdiang bad ngi pynrem jur ïa kane ka jingleh klet jong ka sorkar ïa ki nonglum khubor kiba napoh ka jylla jong ngi,” bynrap u bah Suchiang.
Ha kaba ïadei bad ka jingïakren pynbeit pud, la ïoh jingtip ba ka shnong Ratacherra ki kwah ba ka wah Malidor kan dei ka National Boundary bad ba u pud u dei ban long hapdeng jong ka wah Malidor kan hap hapoh ka jingpeit jong ka Assam bad ka Sorkar Assam ruh ka la kular ba kan peitngor ban pynneh pynsah ïa kane ka wah bad ïa ka mariang.
Ka KSU ka la pdiang ïa kane ka jingïakren ba ka wah Malidor kan long kum ka National Boundary. Ka jingïalang kaba la long hynin ka sngi kam pat lah satia ban rai eiei bad ïa ka rai yn sa shim da ki Myntri Rangbah ka Jylla Meghalaya bad ka Jylla Assam.