Sa ha West Jaintia Hills pynkreh ka MCA ban tei ïa ka madan ïalehkai kriket kaba paka

Shillong, K’Lyngkot 05 : Khnang ba kiwei ki bynta jong ka Jylla kin ïoh lang ïa ki jaka ïalehkai kriket kiba paka bad ruh ban plie lad ïa ki riew donsap ha katei ka jingïalehkai, na ka liang ka Meghalaya Cricket Association ka la shim sa kawei pat ka sienjam kata ban pyntikna ba baroh ki distrik kin mih madan ban pyni ïa ka sap kaba ki don ha katei ka jingïalehkai lyngba ka jingdon ki jaka ïalehkai kiba biang.
Shi bynta jong kane ka sienjam, na ka liang ka Synjuk ka la pynïaid shaid shaid mynta ban buh ia ka jaka ïalehkai kriket ha Mukhla kaba don ha West Jaintia Hills bad ïa kane la dep ban pyntikna ha ka 04tarik mynta u Kyllalyngkot, 2025.
Katkum ka kyrwoh, la pyntip ruh ba la pyndep ruh ïa ka jingïasoi hapdeng ki lai mamla lane ka tripartite lease agreement, kata hapdeng ka Mukhla Dorbar Pyllun, West Jaintia Hills District Cricket Association bad ka Meghalaya Cricket Association, bad shim ïa ka jaka kaba heh 5.93 akar na ka bynta ban pynbha ïa katei ka jaka sha ka madan ïalehkai kaba paka kaban don lut ïa ki jingdonkam baroh.
Ïa kane ka jaka la lah ba ïoh da ka jingmaitphang da ka WJHDCA ryngkat ka jingkyrshan lang u MLA ka thaiñ Bah Wailad Shylla uba ïalade u dei uwei na ki rangbah ba ieid bha ïa ka jingïalehkai kriket bad ruh da ka jingkyrshan borbah jong ka Mukhla Dorbar Pyllun.
Ïa kane ka jingsoi ïa ka soskular la pynïaid da u Bah Eddystone Shylla, President ka WJHDCA ryngkat ka jingdonlang u Bah Wailad Shylla,MLA, Naba Bhattacharjee President MCA, Rayonald Kharkamni, Vice President, MCA, Dhrubajyoti Thakuria, Treasurer MCA, Weibor Sohlang Secretary bad baroh ki nongkitkam jong ka WJHDCA nalor u Bah Hamran Shylla, President bad Bah Hachwa Suna,General Secretary, Mukhla Dorbar Pyllun bad kiwei kiwei.
Na ka liang u President jong ka Meghalaya Cricket Association ha ka jingkren u la pynpaw ka jingsngewnguh ïa ka Mukhla Dorbar Pyllun kaba la ai sbun mynsiem ïa ka jaka ha rud surok kaba don tang kumba katto katne kilometer na surokbah.
Shwa kane ka jingïasoi ïa ka soskular ka la don ruh ka jingleit jurip lang ïa ka jaka ha kaba ki kynhun ki la pynpaw ka jingsngewhun ïa ka jinglong ka jaka na ka bynta ban tei ïa ka madan ïalehkai kriket kaba paka khamtam naba ka madan ïalehkai phutbol ruh ka donlang hangtei markhap hi.
U President u la ong ruh ba na ka liang ka MCA kin ai ka jingkyrshan ïa baroh ki sienjam na ka bynta ban kyntiew ïa ka jingïalehkai kriket naduh tynrai da ka thong ban kyntiew ïa kane ka jingïalehkai shajrong.