Shillong, K’Lyngkot 05 : Ka Mawlai Sports Club bad ka Rangdajied United FC ka la sdang ïa ka snem thymmai da ka nam jop ha ka lympung ïalehkai jong ka OC Blue Shillong Premier League 2024 ha ka jingïakhun kaba long ha kaen ka sngi Saitjaiñ ha madan SSA Stadium, First Ground Polo.
Ka Mawlai kaba la bat ruh ïa ka nam lahduh ha ka lympung ka la hap ban ïakhun tyngeh haduh ba kan da lah ban pynliem kdur ïa ka Laitkor da 1-0 kol ha ka jingïalehkai kaba itynnad bha. Ïa kane ka kol jop la ïoh banthep da u Baiaikara Swer ha ka minit kaba 82 jong ka kylla miet.
Haba phai pat sha kawei ka jingïakhun, ka Rangdajied ka la ïoh ban pynliem haduh 4-0 kol ïa ka Nongthymmai Sports Club. Ïa ki kol ha kane ka sngi la ïoh ban thep da u Owanijuh Pajuh ha ka minit kaba nyngkong mar ïa sdang jong ka jingïakhun, nangta na u Benny Khriam ha ka minit kaba 41 bad ïa ki ar tylli ki kol ha ka kylla miet la ïoh ban thep da u RT Hanson Pdang ha ka minit kaba 88 bad 90+4.
Ryngkat ka jingrisa ki paidbah, ka Laitkor ka la pyneh hi triang khlem da ailad satia ïa ki rangthep kol jong ka Mawlai ba kin rung suk sha phyllaw kol jong ki.
Ka jingïakhun hapdeng madan ka la pynshong shit bha ïa ki nongpeitkai ruh namar ba ka Laitkor ka ïoh lang ïa ki kabu ksiar ban pynkhih jar khamtam ha ka kylla miet lyngba u Moonstar Nongsiej hynrei um shym la lah satia ban khyrwit jam ïa ka bol sha ka kol.
Dei tad haduh ba la sah sa tang kumba 10 minit ei ei ka por ïalehkai ba ka Mawlai ka la sdang ban kham ïakhun tyngeh ba kane ka rukom ïalehkai ka la plie lad ïa ka ha ka minit kaba 82 lyngba ka bol kaba wan beit ha ka kjat u Baiaikara bad une u rangïalehkai ruh khlem bakla u la shu khyrwit beit ïa ka bol sha kol.
Related Posts
Ha kawei pat ka liang, ka Laitkor ka la hap ban ïalehkai tang 10 ngut hadien ba u Euvasius Mawthoh u la shah beh noh na pdeng madan. Kane ka la jïa ha ka por ba ki rangïalehkai ka Laitkor ki la hylla ba ka dei ka ‘handball’ ha phyllaw kol hynrei na ka liang u rephri u la pynïaid beit ïa ka jingïakhun shakhmat. Kane ka la pynlong ïa u Euvasius ban bitar haduh ba u rephri u la sei syndon da ka redcard ban ai jingsneng ïa u.
Da kane ka nam jop ka Mawlai ka la ïoh mynta ban don ha khlieh duh jong ka miej ïa khein point da ki 16points bad bteng ruh ïa ka jingïakhun khlem pat shah rem. Katba na ka liang ka Laitkor pat ka khlem pat ïoh lad satia ban thep kol ha ki lai na ki saw tylli ki jingïakhun.
Nangta, ka jingjop jong ka Rangdajied ka la pynlong pat ïa ka Laitkor ban hiar shi kyrdan bad poi mynta ha ka kyrdan kaba hynñiew.
Ha ka jingïakhun hapdeng ka Rangdajied bad ka Nongthymmai, u Owanijuh u la ïoh ban pynkhih jar tang ha ki 50 sekhon mar ïa sdang ka jingïalehkai bad hadien kane pat u la ïoh ban pashat ïa ka bol sha u Benny uba ma u ruh khlem pynlehnohei u la ïoh ban thep ïa ka kol kaba ar. Ka jingïakhun ha kane ka kynti ka la kham noh khyndiat sha ka Rangdajied watla ka Nongthymmai ka la ïakhun tyngeh ban ïoh thep kol lang. Tangba ha ka jingïalehkai, u Ronald Singh Shaikhom u la dei ban ïoh thep ar kol hynrei ka jingtbit palat jong u rangap kol ka Rangdajied u Meshan Banjop Sumer ka la pynpulom noh ïa baroh ar tylli ki kol ban rung sha ka jar. Lah ruh ban ong ba kane kadei ka sngi ïalehkai jong u Hanson namar watla u ïoh ban mih madan kum u rangïalehkai shong ben hynrei u la ïoh pat ban thep haduh ar kol na bynta ka Rangdajied.
Kumba long mynta, ka Rangdajied ka la jop ban ban haduh saw tylli ki jingïakhun bad ka la ïoh ruh ban don ha ka kyrdan kaba saw jong ka miej kheiñ point da ki 12 point.
Haba ïadei pat bad ka Nongthymmai watla kane kadei ka sien shah rem kaba saw hynrei ka dang dei pat ka jingïakhun kaba ar ba ki khlem ïoh ban thep kol. Kumba long mynta, kane ka kynhun ka don da ki 7 point mar katjuh bad ka Langsning hynrei ka shah tam pat da ka jingïapher ha ka jingïoh thep kol.
Ka jingïakhun ha kane ka sngi Nyngkong pat kan long hapdeng ka Shillong Lajong FC pyrshah ïa ka Nongrim Hills SC ha ka por 2:00 baje nohphai sngi.