Shillong, Naiwieng 07: Ka kynhun ïalehkai jong ka PFR FA ka la kylla long ka kynhun ba ar ban jam sha ka semi final ha ka SSA 3rd DIVISION Football League 2023 hadien ba ka la jop ha ka Quarter Final kaba long hynne ka Sngi Hat Majai ha madan 1st Ground SSA Stadium.
Kane ka jingïakhun la sdang ha ka por 2 baje hapdeng ka PFR FA pyrshah ïa ka Lawmali Pyllun SC. Haba phai sha ka jingïakhun ka PFR FA ka la pynpaw ïa ka jingkhlaiñbor da kaba pynjemkhnap bad pynbam haduh saw kol ban ïohrung sha ka semi final.
Dei lyngba u Samlang Rympei (38 minit) ba ka PFR FA ka la ïoh ban lakhmat ïa ka jingïakhun, nangta bud sa ka kol na u Robi Maring (lyngba ka Penaly) ha ka 46 minit, bad ka kol kaba lai la wan na u Thymmaibor Mukhim ha ka 51 minit bad khadduh na u Fairming Suting ha ka minit ba 57.
Ka jingpynïakhun ïa ka quarter final kan bteng biang ha ka 10 tarik Naiwieng, ha kaba ka Mylliem Lum SC kan aireng pyrshah ïa ka Nongmensong SC, bad ha ka 11 tarik ka Tynring SC kan aireng pyrshah ïa ka Nongkseh SC, ka por kan long 2 baje nohphaisngi ha SSA Stadium.
