Yn ïoh sakhi biang ki riew ieid phutbol ka jylla ïa ka jingïakhun I-League ha Polo

Shillong, Naiwieng 07: Ka long ka khubor kaba sngewtynnat ïa ki paid riew ieid phutbol jong ka jylla khamtam ïa ki nongkyrshan ba shitrhem jong ka kynhun Shillong Lajong FC ha kaba kin sa ïoh ban sakhi biang ïa ki jingïakhun lympung I-League ha nongbah Shillong ka ban sa long ha madan Polo hadien ba katei ka klob ka ïoh ban kyntiew kyrdan biang ïalade sha katei ka lympung.
Kane ka klob kaba mihkhmat ïa ka jylla ka la ïoh ban kiew kyrdan biang sha ka lympung lehkai I-League na bynta ka samoi lehkai 2023/24 hadien ba ka la wan ha ka kyrdan ba ar (runners up) ha ka Second Division I-League, bad kane ka long ka sien ba nyngkong hadien saw snem ba shah sloit na ka I-League.
Ka Shillong Lajong FC ka la sdang ïa ka samoi 2023/24 I-League da kaba ïasam mar shi point bad ka Mohammedan SC naba ïakhaid da mar 1-1 kol ha ka jingïakhun kaba la long shabar nala ïing, ha Kolkata, Naihati Bankimanjali Stadium -West Bengal ha ka 3 tarik Naiwieng, 2023.
Kaba sngewtynnat ka long ba ka Shillong Lajong FC kan sdang ïa ka jingïakhun hala ïing pyrshah ïa ka Neroca FC (na Manipur), kaba dei ka jingïakhun klob ka thaiñ North-East lane ka “North-East Derby” ha ka 9 tarik Naiwieng (lashai ka sngi Palei), ha ka por 2 baje nohphaisngi ha SSA Stadium, Shillong.
Mynta ka samoi, ka kynhun ka don ïa ki samla bad ki rangïalehkai kiba la kham rangbah bad kiba la shemphangbha kiba la wanphai biang bad ka klob kynthup ruh ïa ki saw ngut ki player ba na shabar ba ka kynhun ka la soi (Daniel Goncalves , Renan Paulino , Abdou Karim Samb bad u Takuto Miki )
Ha ka sien ba nyngkong ha ka history jong ka klob ba ka Shillong Lajong FC ka la kyntiew kyrteng palat 21 ngut ki player kiba napoh ka jylla na bynta kane ka samoi jong ka I-League. Napdeng kine ki rangkynsai ba ka klob ka sei madan ban pynïakhun ha kane ka lympung ki dei kiba la shah jied na ka shlem ai jinghikai jong ka klob (youth academy) bad don napdeng kine kiba la ïoh mih madan ha ka jingïakhun pyrshah ïa ka Mohammedan SC kiba kynthup ïa u Ronney Willson Kharbudon, Damaitphang Lyngdoh, Sangti Janai Shianglong, Kynsaibor Lhuid bad u Shano Tariang.
Ka kynhun kan sa don hadon phra tylli ki jingïakhun ban long hala ïing ki ban sa long ha u Naiwieng bad Nohprah. Bad na bynta ki ticket ban sakhi ïa ka jingïakhun pyrshah ïa ka Neroca FC la ïaid ban die naduh hynnin ka sngi (7 tarik Naiwieng ) bad lah ban ïoh napoh Electronic Centre, Police Bazaar, na Cafe Shillong, Laitumkhrah bad na SSA Ticket Counter.

Ki rangkynsai napoh ka jylla ki ban sa mih madan ïa ka kynhun ha kane ka samoi 2023-24 I-League ki long: Hardy Cliff Nongbri, Phrangki Buam, Kenstar Kharshong, Kynsailang Khongsit, Allen Camper Lyngdoh Nongbri, Damaitphang Lyngdoh, Atlanson Kharmaw,Gladdy Nelcen Kharbuli, Iohborlang Lyngdoh Lyngkhoi, Ronney Willson Kharbudon, Henryford Nongneng, Saveme Tariang, Figo Syndai, Batskhemlang Thangkhiew, Sangti Janai Shianglong, Hamedamanbha Wahlang, Ronaldkydon Lyngdoh Nonglait, Wadajied Kynsai Ryngkhlem, Everbrightson Sana Mylliempdah, Kynsaibor Lhuid and Shano Tariang.