Rem ka Lajong ha ka jingïakhun ba nyngkong jong ka Kalinga Super Cup

Kalinga Stadium, Kyllalyngkot 10: Ka kynhun ïalehkai jong ka Shillong Lajong ka la mad ïa ka namrem hakhmat ka Kerala Blasters FC da 3-1 ha ka jingïakhun ba nyngkong jong ka ha ka Kalinga Super Cup ba la long hynne ka Sngi ha madan Kalinga Stadium Pitch 1, Bhubaneswar.
Haba phai sha ka jingïakhun, lah ban kdew ba ka Lajong ka la sdang ïa ka jingïalehkai da kaba ïalehkai bha hynrei kam shym la lah ban pynurlong ïa ki kabu ba ka la ïoh. Phewse, dei ka Kerala Blasters kaba la ïoh ban lamkhmat lyngba ka kol ha kaminit ba 15 ba la thep da u Kwame Peprah u ba dei tynrai nong Ghana.
Kam shym la slem ïa ka Kerala ban pynbud sa ïa ka kol kaba ar ba la thep biang da u Kwame ha ka 27 minit.
Na ka liang jong ka Shillong Lajong ka la ïoh ban khyllie ïa ka shi kol lyngba ka penalty ba la shut da u kapten ka kynhun-u Renan Paulino De Souza ha ka 29 minit hadien ba u Karim Samb u la shah pynur hapoh phyllaw kol da u rangapkol ka Kerala- u Sachin Suresh. Ha kaba kut jong ka kylla step, ka Kerala Blasters ka la lamkhmat da 2-1 kol.
Haba jam sha ka jingïakhun jong ka kylla step, ka Kerala Blasters ka la nang pynkhlaiñ shuh shuh ïa ka rukom ïalehkai bad ïoh ban thep sa ïa ka kol kaba lai ha ka 46 minit lyngba u Mohammed Aimen. Kane ka kynhun kaba khliehduh ïa ka lympung ISL ka la khylliap ïa ka jingïalehkai ryngkat ka namjop da 3-1 kol ban khur baroh 3 point.
Da kane ka namrem, ka Shillong Lajong kan phai mynta ban pynkhreh ïalade ban aireng pyrshah ïa ka kynhun ka thaiñ North East ïa kaba la tip ruh da ka ‘North-East Derby’ bad kane kan long pyrshah ïa ka North-East United FC ha ka Lah Sngi U Blei, 15 tarik mynta u Kyllalyngkot ha ka por 2 baje nohphaisngi ha Kalinga Stadium Pitch 1, Bhubaneswar.