Nongpoh, KyllaLyngkot 10: Ki nongïalam jong ka kynhun Ri-Bhoi Peoples Council (RBPC) hapoh ka jingïalam u samla Jayson Lenox Nongrum kum u president ryngkat ki dkhot hynnin ka janmiet ki la hiar sha ka shnong Pahammawleiñ 20 mer ban pdiang burom ïaki 5 ngut ki rang ïa kura ki ba la wan rah nam bad burom ïaka jylla haki kyrdan bapher bapher naka lympung National Kick Boxing Championship kaba la pynïaid daka Kick Boxing Federation of India kaba la long ha New Delhi.
Kitei ki 5 ngut ki rang ïa kura ki ba la lam khmat da u Bah Thomas Rongthaluh kum u Coach u ba dei ruh u President ka Meghalaya Marshal Arts Federations, kynthup ïa u Rimanbha Syngkli u ba la ïakhun haka kyrdan 59kg, uba ioh ban khur takma ksiar haka rynsan Full Contact bad takma rnong haka rynsan Point fighting, Samla Wankupar Syngkli uba la ïakhun haka kyrdan 71 kg, u la khur takma ksiar haka rynsan Low Kick bad takma rupa haka rynsan Point Fight, Samla Hyrnai Khymdeit u la khur takma rupa haka rynsan kick light, Samla Kyrshan Lyngdoh uba ïakhun haka kyrdan 54kg, u la khur takma rupa haka rynsan low kick, bad u Samla Francis Kleiñ uba ïakhun haka kyrdan 63kg u la khur takma rupa haka rynsan low kick.
U Bah Thomas Rongthaluh kum u coach uba ïalam ïa kitei ki 5 ngut um lah khlem da pynpaw ïaka jingkmen ban wan rah ïaki takma sha iing lyngba kitei ki 5 ngut ki rang ïakura, u la ai ka jingïaroh ïa kitei ki 5 ngut ba dei lyngba ka jingtrei shitom jong ki ba ki la lah ban wanrah ïaka nam ka burom ym tang ïaka Ri-Bhoi District hynrei ïaka jylla hi baroh kawei.
U bah Thomas u la ai khublei ruh ïaki kynhun sengbhalang ki ba la don bynta ban snohkti lang naduh ka sngi ba ki mih na ïing ban pyndap lem ïaki jingduna jong ki ha kaba ïadei bad ka leit ka wan, u la pynpaw ruh ka jingkhublei ïaki riew shimet kiba la ïarap ban pyndap lem ïaki jingduna jong ki bad u la ong ruh ba lada kim don kine ki nongkyrshan kin nym lah ban poi shaduh kane ka thong.
Shuh shuh une u coach u la pynpaw ruh ïa shibun ki jingeh ba ki hap ban ïaid lyngba ha kaba ïadei bad ka leit ka wan bad khamtam eh u la ban jur ha kaba ïadei ba ka jaka ïalehkai, ha kaba ki hap ban kilan met ïalade ha ka jaka ba long madan bad ki hap ban shna hi ïaki tiar kilan met da ki dieng ki siej namar ba kim don ïa ki tiar bad ki jaka milan met kaba biang bad dei halor kine ki jingduna ba kiwei ki jylla ki kham kiew sha khmat ha ka jingïalehkai ban ïa nujor bad ki nongïalehkai jong ka jylla jong ngi, u la pynpaw ruh ba lada kine ki samla kin ioh ïaka jaka bad ïaki tiar ki ba biang khlem pep kin lah ban leh kham bha shuh shuh ban ïa kiwei pat ki jylla.
U Samla Jayson Lenox Nongrum kum u President u la pynpaw ka jingsngewkhia kaba jur halor ka jing bym phaikhmat jong ka sorkar ïaki samla ïalehkai jong ka jylla ba bunsien hi watla ki wanrah ki nam bad burom ki dei ki seng bhalang kiba ju pdiang burom sha ka jylla bad kaba sngew sangsot shuh shuh ïa kitei ki nongïalehkai ka long ba tang ka bai tiket ba ki leit bad wanphai ruh kim don hynrei sngewnguh shibun ïa u Blei ba ki don pat ki kynhun kiba noh sngewbha da ka pisa ba kin ioh ban wanphai suk sha ka jylla. Shuh shuh u la ban jur ruh ïaka sorkar khamtam ka tnad ïalehkai ban phaikhmat baroh ki liang & jingmyntoi sha ka kam ïalehkai ba ki samla ka jylla kin ïoh mynsiem ban nang kiew shaphrang.
