Shillong, Kyllalyngkot 10: Arngut ki rangïakura ka Jylla na ka thaiñ Upper Shillong, ba kynthup ïa u samla Shanborlang Marbaniang bad u samla Ïarapborsing Kharbani hapoh ka lama jong ka Meghalaya Pro Boxing Council (MPBC), sa shi sien pat kin leit mihkhmat ïa ka jylla sha ka rynsan ïakura Pro Boxing ka ban long ha nongbah Mumbai ha ka 12 tarik mynta u Kyllalyngkot (kata lashai ka sngi) bad ka jaka kan long ha Planet Hollywood Thane.
Kane ka rynsan ïakura kaba la tip da ka United Professional Boxing Fight Club ka dei kaba la kyntiew hi da ka United Professional Boxing Fight ka kynhun kaba dang hap hapoh ka jingkhmih jong ka Indian Boxing Council, ha kane ka kynti kin don haduh 7 tylli ki jingïakhun ba la khreh bad 2 tylli ki dei ki jingïakhun ba kine ki arngut ki samla ka Jylla kin sa don bynta. Baroh arngut, kata u samla Shanborlang bad u Ïarapborsing ki la ju wanrah nam ïa ka Jylla lyngba ki namjop ba ki la khur ha u snem ba ladep.
Lashai ka sngi u samla Shanborlang (record : 4 jop : 2 ïakhaid na ki 6 sien ïakhun) un aireng pyrshah ïa u Adil Kumar (record 4 jop: rem 1: ïakhaid 1) ha ka kyrdan ïakhun Super Fly Weight ka ban long 8 Round. Kane kan dei ruh ka sien kaba ar ïa kine arngut ba kin ïakynduh pyrshah, ha kaba ka sien ba nyngkong ba ki ïakhun ka la kut ym shym la don nongjop ne ba rem naba ïakhaid katkum ka rai jong ki nongbishar.
Katba na ka liang jong u samla Ïarapborsing un sa ïakhun pyrshah ïa u Saurabh Kumar ha ka kyrdan ïakhun Bantamweight ka ban long 8 Round. Lah ban kdew hangne ba u rangïakura ba u samla ïarapborsing u hap ban ïakhun, u dei u ba la kynsai bha bad bat ïa ka record da 10 sien jop, rem 1 sien na ki 11 sien ïakhun, katba u ïarapborsing u la ïakhun lai sien, jop 2 sien rem 1 sien.
Na ka liang jong ka MPBC ka la kitbok kitrwiang ïa kine shuwa ba kin mih ban leit ïakhun sha katei ka rynsan ïakura ka ban long ha nongbah Mumbai ryngkat ki kyntien ai mynsiem bad ka jingkyrmen ba kin wanphai namjop sha la ïing.
Haba ïakren sha ki lad pathai khubor, na ka liang jong u Bah Kampherki Thangkhiew Secretary jong ka synjuk Meghalaya Professional Boxing Council (MPBC), u la pynpaw ba na ka liang jong ka Association ka la pynkhreh bha ïa kine baroh arngut ban wanrah jingjop.
Nalor kane u Bah Kampher u la kyntu ruh ïa kino kino ki briew ne ki kynhun kiba kwah ban ai jingkyrshan ïa ka synjuk ki lah ban wanmih ha ka ophis kaba don ha Nongkseh (Upper Shillong).
