Under-16 Boys Football League: Khur jingjop saw tylli ki kynhun
Khyrwit hat trick u Bestius Nongbsab.
Shillong, Kyllalyngkot 10: Ki saw tylli ki jingïakhun jong ka lympung Under-16 Boys Football League 2023-24 ba la long hynne ka Sngi.
Haba phai sha ka jingïakhun kaba nyngkong por 9 baje mynstep ha madan phutbol 1st Ground SSA Stadium, ka Lumshyiap SC ka la shah pynliem da 0-2 kol ha ka Upper Shillong Colt.
Ka Upper Shillong Colt ka la ïoh ban thep ïa kine ki ar kol lyngba u Damankhraw Syndor ha ka 50 minit bad na u Mebanbhabok Sun ha ka 60+1minit.
.Ka jingïakhun kaba ar ba la sdang ha ka por 11 baje mynstep ha SSA Stadium, ka Umphyrnai SC ka la lah ban jop kput haduh 8 – 0 kol pyrshah ïa ka Umpling SC.
Ki rangïalehkai na ka Umphyrnai kiba la ïoh ban pynkhihjar ki kynthup ïa u Batmeki Kharkongor ar kol ha ka 12 & 36 minit, nangta u Arjuneson Kharkongor ha ka 36 minit, u Ricky Kharkongor u la ïoh thep ar kol ha ka 44 bad 54 minit, u Iaiapynkmen Kharkongor shi kol ha ka 51 minit bad khadduh u Vickyson Wankhar u ba la ïoh ar kol ha ka minit ba 58 bad 60.
Ka jingïakhun kaba lai ka la sdang ha ka por 2:30 baje mynsngi ha1st Ground SSA Stadium, ha kaba ka Merinda FC ka la jop suk da 7 – 0 kol ïa ka Lah Bet SC. Ha kane ka jingïakhun u wei na ki rangïalehkai ka Merinda SC, u Bestius Nongbsab u la ïoh khyrwit hat trick (54 min, 58 min & 60 min). Katba u Kevin Kharbuki u la ïoh ban thep ar kol ha ka minit ba 3 & 55, u Mebankitlang Mawlong u la ïoh thep shi kol ha ka 9 minit, bad kawei na ki kol kaba la kum thep hi da u bak ka liang pyrshah-u Stevenson Kharsahnoh ha ka 38 minit (Own Goal).
Haba phai sha ka jingïakhun kaba khadduh kaba la sdang ha ka por 2 baje nohphaisngi ha SSA Stadium, ka Rangdajied United FC ka la pynliem da 3 – 0 kol ïa ka Mawpat SC. Kine ki lai kol na ka Rangdajied United FC la thep da u Nicky Paul Marwein ha ka 34 minit, bud sa ka kol na u Menangpyndap Khongjee ha ka 37 minit bad khadduh ba la thep hi da u bak ka liang pyrshah-u Domiwell Kharkongor ha ka 55mins (Own Goal).
Mynta ka sngi yn bteng biang ïa ka jingïalehkai Football League 2023-24 kyrdan 1st DIVISION ba la pynïaid da ka Shillong Sports Association, ha madan phutbol SSA Ground, bad ka por kan long 2:15 baje nohphaisngi hapdeng ka Mawkhar SC pyrshah ïa ka Lawsohtun SC.