Mawkyrwat, Jymmang 16: Da ka jingwan hap u slap uba jur tang ha kine ki kyndiat sngi kaba la pynlong ïa ka khyndew ba kan jem bad shong synjor bad kumjuh ruh ka la pynlong ruh ïa ki wah ba kin kiew ha ka jingdon jong ka um.
Kumta halor kane jingwan u slap u ba jur, ka la don kawei ka jingjia ha kaba ka um ka rad naphang ïa ki kynroh jong kawei ka jingtei ha Phod Mawpon, Mawkyrwat, South West Khasi Hills District ha kaba ha kane ka jaka ki ban shna ban pyni-tynnad ïa katei ka wah bad ruh ban pynneh pynsah ïa ki dohum dohwah.
Katkum ka jingïoh jingtip ba ïa katei ka kynroh ba la rong ha ka um saw la pyntrei lyngba da ka National Rural Employment Guarantee Act (MGNREGA) ne ka skhim 100 sngi ha ka mang tyngka kaba kot T. 21 lak tam ei ei.
Namarkata, halor kane ka jingpra na ka daw jong ka jingshah rong jong ki kynroh ha ka um ka la long da shisha ka jingduhnong kaba khraw na ka bynta ka jingthmu ban pynwan dur i-tynnad ïa kane ka Phod Mawpon bad na ka bynta ka jingthmu ban pynneh pynsah ïa ki dohum dohwah ha kane ka jaka.
