Shillong, Jymmang :Ka Syngkhong Rympei Thymmai (SRT) ha ka ‘Annual General Meeting’ jong ka, ka ba la long ha ka 3 tarik mynta u bnai ha Meghalaya Bharat Scouts and Guides, Pinemount Ridge, Shillong ka pynpaw ka jingsngew khia ka ba jur ha ka ba ïadei bad ki kam banbeiñ bad ki kam lehbor pyrshah ïa ki khunlung khynnah.
Ha ka jingkren lamphang u Acting President u la kren bynñiaw bha halor ka jinglong jingman hapoh ka jaidbynriew Khasi ba ngim shngaiñ shuh ha baroh ki liang, kata la ka long ha ka liang ka synshar khadar, ka ïaid ka ïeng, ka lawei ki samla, ka hiran ha ki kam ki jam, ka jingtroiñ ha ka ïoh ka kot, ka jingshah thombor ha ki jaka khappud, ka jingshah banbeiñ ka longbriew manbriew khamtam ki khunlung khynnah.
U la ban shuh shuh ba katkum ka kaiphot ba dang shu ïoh shen na ka Meghalaya State Commission for Protection of Child rights ( MSCPCR), ka paw pylleiñ ba la kynrei ki jingjia shah banbeiñ, ki kam batbor leh tohmet ïa ki khynnah khyllung ha kine ki snem ki ba la leit bad haduh mynta mynne.
Nalor kata u la ong ruh ba ka dawbah ka ba pynlong ïa kane ka dei namar ki jingsynjor ki longïing longsem, ka pait ka pra khiewja bad khamtam ha jin bymdon u kpa ka ïing ban da ban sumar, bad la ïohi shynna ïa ka jingbanbeiñ, thombor ïa ki khunlung khynnah ka la nangjur bha ha kine ki sngi bad ki ba leh ïa kine ki kam ki dei bunsien ki kñi ki mama bad katto katne na ki kpa, kine ki mama ki shim kabu namar bunsien kine ki khynnah kiba shah leh tohmet bad thombor bun na ki ki dei ki bym don kpa ne kiba la phet noh u kpa.Kumta u la ong ruh ba dei tang lyngba kane ka saiñpyrkhat jong ka seng SRT kaba lah ban pynduna ïa kum kine ki jait jingjia.
U Bah C. Doloi u ba long uwei na ki dkhot jong ka seng u la kren ruh halor ka jingai bynta lang ïa ki Khun shynrang kam da long kumjuh ha ka Ri khasi bad u la ong ruh ba u shynrang khasi ai jait kpa u dei ban long uba kamai kajih uba la pynbiang lut baroh shwa ba un shongkurim, bad u la ong ruh ba ka Tangjait kam dei ban mih ha u shynrang khasi uba shongkurim ïa kawei pat ka briew ka bym dei Khasi bad ka jait ka khong ba ai sha ki khun ka dei beit ka jong u hi.
Ha kane ka jingïalang ba la pynïaid da u Acting President u Bah Teibor Khongjee la ïa don lang ruh ki dkhot na ka central body bad na ki unit bapher bapher na kylleng ka Ri Khasi. Ha kane ka sngi la ïoh ruh ban jied ïa ki Nongkitkam bad la mynjur da ka General body ïa kine ki nongkitkam na ka bynta u snem 2022-25.
Kine ki nongkitkam ki kynthup ïa u Adiviser Bah K.A Pariat, President Bah Teibor Khongjee, Vice President Bah G.R Pariong, Gen Secy Bah Armour Lyngdoh, Asst. Secy Bah Johny R. Lyngdoh bad Finance Secy Cum Treasurer Bah Pynshai Shynret.Kane ka long katkum u kyrwoh lyngba u Bah A. Lyngdoh, General Secretary Syngkhong Rympei Thymmai.
