Nongpoh, Jylliew 27: Ka Mera Yuva Bharat (My Bharat Ri Bhoi) bad All Billy Correlative Development (Ri Bhoi Branch) haka jingïatreilang bad ka District Integrated Strategy for HIV and AIDS (DISHA) da ka jingkyrshan lang ka Meghalaya AIDS Control Society (MACS) mynta ka sngi kala rakhe ïaka International Day Against Drug Abuse and Illicit Trafficking haka shnong Tamulkuchi, Ri-Bhoi District.
Kane ka jingïalang ka long ban ai ka jinghikai sha ki samla bad ka imlang ka sahlang halor ka jingma u drok bad kiwei kiwei ki jingdih buaid khamtam haki khun samla kiba dang khie dang san bad kiba dang donkam ki nonglam lynti bad ka lawei kaba phyrnai.
Ha kane ka sngi u Bah Himanta Timung, Convener of Nasha Mukt Bharat Abhiyaan u la leit ban shim bynta kum u kongsan haka jingdonlang ka samla Babylon Lyngdoh, Programme Coordinator of ABCD bad Mera Yuva Bharat Ri Bhoi.
Haba kren ha kane ka sngi naka liang u Bah Himata Timung kum u kongsan u la ong ba u drok u dei u jait jingdih u ba ma tam haka imlang ka sahlang ba ki khun samla kim dei da lei lei ruh ban ktah, hynrei ban long ki nongrah khubor ba bha ban pynsngewthuh sha ki para ba ka jingim ka long kaba kordor bad ngi ioh tang shisien kumta ngi ban im ha kata ka rukom kaba tei ïalade ïaka iing ka sem bad ka imlang ka sahlang baroh kawei bad kane ka jingangnud baroh ka urlong tang lada iwei pa iwei ngi don ka jingïatreilang bad ka jingkitkhlieh lang.
