Jowai, Jylliew 27: Ka Pdengshakap Primary Health Centre (PHC), West Jaiñtia Hills, ka la rakhe ïa ka jingjop jong ka ïaka National Quality Assurance Standards (NQAS) Certification ha ka jingïalang bala pynlong ha katei hi ka PHC, ha ryngkat ka jingdonlang u myntri ka tnad pule puthi bad u MLA ka thaiñ u ma Lahkmen Rymbui kum u kongsan, nalor ki ophisar, ki nongtrei ka koit ka khiah, ki bor pynïaid District, ki nongïalam shnong, ki ASHA bad ki dkhot jong ki Village Health Committee.
Katkum ka kaiphod bishar bniah jong ka NQAS, ka Pdengshakap PHC kala ïoh ïa ka jingkheiñ kyllum jong ka jaka sumar kaba long 91.56 percent, kaba la jop ban pyndep ïa ki kyndon bad ka jingkheiñ jingdiah jong ki nongpang kaba long 82.56 percent, kaba pyni ïa ka jingbha jong ka jingshakri ha ka koit ka khiah sha ki paidbah.
Haba ai jingkren u ma Lahkmen ula ong ka jingjop ïa ka NQAS ka long ka jingsngew sarong ïa ka Pdengshakap PHC bad ïa ka imlang sahlang baroh kawei. Ula ai khublei ïa ki Doktor, ki Nurse, ki ANM, ki ASHA, ki Village Health Committee, ki Joint Action Committee bad baroh ki nongtrei baroh.
Shuh shuh ula pynkynmaw ba “ka jingïada ka kham bha ban ïa ka jingsumar.” U la kyntu ïa ki briew ban pyndonkam hok ïa ki jingshakri kiba don ha ki PHC bad ki Sub-Centre, ban ïatreilang bad ki prokram ai jingsumar jong ka sorkar bad ban pynthikna ïa ka jingpynrung kyrteng Aadhaar bad ban ïoh ïa ki skhim ai jingsumar jong ka sorkar.
Naka liang u Medical Officer In-Charge, Pdengshakap PHC, ula aiti ïa ka jingthoh sha u Myntri ban pan jingïarap kyrkieh na ka bynta ka PHE naduh ka Building, ka kali kit nongpang, ka kor internet ban pynkhlaiñ ïa ki jingshakri ha ka koit ka khiah digital, ka jingdonkam ban pynbun shuh shuh ïa ki nongtrei nalor kiwie de.
U Sub-Divisional Medical and Health Officer Dr. Shemphang Pohtam ula pyntip ba ka West Jaiñtia Hills mynta ka la don haduh 8 tylli ki jaka ai jingsumar ba la pynskhem da ka NQAS, kynthup ïa saw tylli ha Amlarem Block, kyrmen ki dang bun ki PHC, CHC bad ki Sub-Centre kin ïoh ïa ka jingpynskhem ha kaba kut jong u snem 2026.
