Ka jingbym biang ka internet bad kiwei de ka dang ïaibteng ban khanglad ïa bun ki samla: Badwar

Shillong, Jylliew 27: Ka Meghalaya Pradesh Congress Committee (MPCC) ha ka sngi Palei ka la ong ba katto katne ki mat ki dang ïai bteng ban ktah ïa ka pule puthi ha ka jylla, kynthup ïa ka jingduna ka digital access, ka jingshaniah ha ki guidebooks bad ki jingeh ha kaba pynbha ïa ka pule dangle.
Haba kren bad ki nongthoh khubor, u secretary ka MPCC u Bah Manuel Badwar u la ong ba ka jingpyrshang jong ka sorkar ban pynbha ïa ka Meghalaya Performance Grading Index (PGI) kan nym wanrah ïa ka jingmih kaba la angnud lymda kam pynleit jingmut bha ïa ka jinghikai bad jingpule ha ki skul.
U la buh jingkylli ïa ka jingpyndonkam ïa ki guidebooks jong u Myntri Rangbah kum ka atiar ban pynbha ïa ka pule puthi, da kaba ong ba dei ban pynshlur ïa ki khynnah skul ban sngewthuh ïa ki sobjek ha ka jaka ban shaniah khamtam ha ka jingbuh jingkynmaw. U Bah Badwar u la pan jingpynshai ruh halor ka jingkiew stet jong ki nongpas ha ki eksamin jong ka jylla, kaba u la ong ba ka kiew na kumba 56-57 percent sha jan 90 percent hapoh shisnem.
U Nongïalam ka Congress u la kdew ruh halor ka jingduna ki lad digital ha ki skul.U la kynnoh ba tang kumba 19.7 percent ki skul ha Meghalaya ki don ïa ki kor kompiwtor, kaba pynlong ïa kiba bun ki khynnah skul ban shem jingeh ban ïaid beit ïaid ryntih namar ba ki entrance test bad ki rukom pynrung klass ki ïaid lyngba ka online.
Katkum ka party, ki samla pule na ki thain nongkyndong ki ju ïakynduh jingeh haba ki pyndap ïa ki form online namar ka jingbym biang ka internet. Ka la ong ba don ki samla pule kiba la duh ïa ka lad ban rung skul namar kine ki jingeh.Ka party ka la kdew ruh ïa uwei u samla pule uba la ïathuh ba u la long uba bit ban ioh rung ha ka IIT hynrei um shym la lah ban shim admission namar ka jingeh ha ka liang ka pisa tyngka.
Shuh shuh ka Congress ka la kynnoh ba bun ki nonghikai ki pynlut por shibun ha ki kam synshar ne (administrative duties) ha ka jaka ban hikai ha ki kamra klas.Ka la ong ba ka jingpynduna ïa ki kam bym dei ban hikai olie ailad ïa ki nonghikai ban kham pynleit jingmut ha ki khynnah skul bad ban pynbha ïa ka jingpule.
Ka party ka la pynskhem ba watla ka pule puthi ka dei ka kamram ba ïasam lang hapdeng ka Centre bad ka jylla, hynrei ka sorkar Meghalaya ka dei ban shim ïa ki sienjam kiba kham tyngeh ban wengïia ki jingeh. Ka la ong ba ka jingpynbha ïa ki jingtei jong ki skul, ka jingpynheh ïa ka jingdon jong ki kor ki bor bad ka jingpynkhlain ïa ka jinghikai ha ki kamra klas ka dei ban long napdeng ki mat ba kongsan jong ka sorkar.
Ka MPCC ka la kyntu ruh ïa ki lad pathai khubor ban pynpaw ïa ki jingeh ba ki samla pule ki ïakynduh ha ki jaka nongkyndong, da kaba pynpaw ba ka jingbym don ka internet bad kiwei kiwei ki lad ki lynti ka dang ïai bteng ban khanglad ïa kiba bun ki samla.