Shillong, Jylliew 26 : Ka Tnad ka Koit ka Khiah ka Jylla kan pynlong ïa ka National Immunization Day (NID) 2026 hapoh ka Pulse Polio Programme ha East Khasi Hills District ha ka 29 tarik Jylliew, 2026, bad pynbud pat sa ar sngi ka jingïaid man ka iing ban pyntikna ba ym don mano mano ki khynnah kiba shah iehnoh khlem da ïoh ïa ka dawai jingïada na ka jingpang Polio.
Ha kane ka prokram, yn ai ïa ka dawai Polio (Oral Polio Vaccine) ïa baroh ki khynnah kiba hapoh 5 snem ka rta, bad yn pyrshang katba lah ban pyntikna ba ym don wat iwei ruh i khynnah kiban sah khlem jingïoh ïa kane ka jingïada.
Ka Tnad Health & Family Welfare ka kyrpad ïa baroh ki kmie ki kpa ba kin wallam ïa la ki khun kiba hapoh 5 snem ka rta sha ki jaka ai dawai ba la pynkhreh ha ki shnong ne dong jong ki ban ïoh ïa ka dawai Polio.
Ka Tnad ka kyrpad ruh ïa ki Rangbah Shnong, ki seng bad ki nongïalam Balang bad ki sengbhalang shnong ba kin ai ka jingïatreilang kaba pura ban pynlong ïa kane ka prokram ba kan long kaba jop bad ban pyntikna ba baroh ki khynnah kin ïoh ïa ka jingïada na ka jingpang Polio.
