Shillong, Rymphang 15 : Ka Kynhun Myntri ka Sorkar mynta ka sngi Palei ka la ai jingmynjur ïa ka jingtyrwa ban pynkiew noh ïa ka Secretarial Assistance ne lad jingïarap ba ju ai sha ki Nongbishar ba la shongthait.
Haba ïakren bad ki nongthoh khubor, u Myntri Rangbah ka Jylla Conrad K Sangma ula ïathuh ba ka Kynhun Myntri ka la ai jingmynjur ïa ka jingtyrwa ban pynkylla ïa ka Retired Judges’ Secretarial and Domestic Help, Rules, 2013.
“ïa kane la pynkylla khatduh ha u snem 2015 bad kumta da ka jingkyrpad kaba wan na High Court bad haba pynshong nongrim ïa ki jingai jingmut, ngi la wanrah ïa ki jingpynkylla ha kane ka Rule” ula ong.
U Myntri Rangbah u pyntip ruh ba ka Kynhun Myntri kala mynjur ruh ïa ki kyndon ban pynkylla halor ka jingsiew ba la ai jingmut da ka 2nd National Judicial Pay Commission.
