Pyllait paidbah u Myntri Rangbah ïa ka CM Connect ban ïoh ïakren ki paidbah bad ka sorkar

Shillong, Rymphang 15: U Myntri Rangbah ka Jylla Conrad K Sangma mynta ka sngi Palei, ula pyllait paidbah ïa ka prokram “CM Connect” ka ban ailad ïa ki Nongshong shnong ba kin lah ban ïakren ha kano kano ka por bad ka Sorkar Jylla.
Lyngba kane ka rynsan, ki Nongshong shnong kin hap ban shu phone ha u helpline No. 1971 ban pynsngew ïa la ki jong ki jingeh bad ki jingdonkam, ïa kaba ka Sorkar kan sa leh eiei.
Kane ka prokram ka long kum ka khun jong u Myntri Rangbah ka Jylla, uba la trei shitom ban pynïadon bynta lang ïa baroh ki Nongshong shnong ha ka jingtreikam jong ka Sorkar Jylla. Kane ka rynsan kan ailad ruh ïa ka Sorkar ba kan sngewthuh ïa ki jingai ïa ki skhim, ki jingtreikam jong ki jingshakri bapher bapher bad ki kam pynroi bala pyntreikam hapoh ka Jylla.
“Kane ka rynsan kan ailad ïa ki paidbah ba kin lah ïakren bad buh jingkylli sha ka Sorkar bad ka Sorkar kan sngap bad jubab bad ban leh eiei ruh ïa ki jingeh ba ki don” ong u Myntri Rangbah haba pyllait paidbah ïa kane ka prokram kaba la long ha Convention Centre ka North Eastern Hill University (NEHU), Shillong Campus.
Kum shibynta jong kane ka prokram, ka Sorkar kala buh ïa ki Ophisar na ki Tnad bapher bapher ba kin khmih bad jubab ïa u paidbah kat kum ka por bala buh. Ki paidbah ki lah ruh ban ïakren bad ka Sorkar lyngba ki rynsan Social Media ba kynthup ïa ka Whatsapp. Kane ka helpline 1971 kan treikam naduh ka por 8 baje mynstep haduh 8 baje mynmiet ha ki san tylli ki ktien ba kynthup ïa ka Khasi, Jaintia bad Garo.
U Myntri Rangbah ula pyllait ruh ïa ki prokram bapher bapher kum ka MegARISE, Meghalaya State Organic Mission 2.0 bad sam ïa ka song pisa hapoh ka Green Meghalaya bad ka FoCUS. Ula pyllait ruh ïa ki project ba ïadei bad ka bha ka miat ki nongrep, ka rep ka riang bad ka jingsumar ïa ka mariang kaba kot haduh T. 400 klur.
Ka MegARISE ne ka jingïada ïa ki Catchment Area ba don jingma ha Meghalaya, ka dei ka project ban pyntyllun shakhmat ïa ka State Water Policy. ïa kane ka project yn pyntreikam da ka song pisa ba T. 344 klur.
Ka Meghalaya State Organic Mission 2.0 ka don ïa ka thong ban pynkylla ïa 100,000 hectare ka jaka sha ka National Programme for Organic Production (NPOP)-certified organic cultivation hapoh u 2029 bad ban pynïoh kamai ba arshah ïa ki nongrep lyngba ka jingnang pynbun ïa ka jingpynmih marrep, pynheh ïa ka dor bad ban pynmih ïa kiwei kiwei ki marbam na ki marrep.
Ha kane ka prokram, u Myntri Rangbah ula plie paidbah ruh lyngba ki kor internet ïa ki 12 tylli ki processing unit bad 3 tylli ki cold storage ha kylleng ka Jylla kiba la pyntrei hapoh ka Meghalaya NEXT. ïa kine ki Unit la ai longtrai bad pynïaid da ki kynhun ki nongrep kiba la thaw da ka thong ba kin ïarap ban pynïoh jingmyntoi kat kaba lah ïa ki nongrep na ki mar rep ba ki pynmih khlem da pynsep ei kai ïa ki marrep.