ïatyllilang ki 8 shnong ban pynrung ïa ka them Mawsadang ha ka map jong ki jaka jngohkai pyrthei ba pawnam

Shillong, Nailur 24 : Ka jingpyrshang ban kyntiew ïa ka kam jngohkai ha Mawsadang bad ki thain ba marjan ka la shim ïa kawei ka dur kaba thymmai, ha kaba ki shnong bapher bapher ki la wan lang ban ïatreilang ban pynlong ïa ka thain kum kawei na ki jaka jngohkai kiba khring ïa ki nongwan kai nalor ban pyntikna ïa ka jingshngaiñ, ka jingpynneh ïa ka mariang bad ka jingmyntoi jong ki nongshong shnong.
Ka Tourism Committee jong ki shnong kiba don ha ka thain Mawsadang ka la kynduh lang hynne ka sngi Palei ban ïasyllok halor ki lad ki lynti ban pynroi ïa ka kam jngohkai pyrthei ha ka thain baroh kawei.
Ïa ka Committee la khlieh da Bah B. Nongbet, Sordar Shnong Mawsadang kum u Chairman jong ka Tourism Committee, kaba kynthup ïa phra tylli ki shnong, kata ka Mawsadang, Pyndenumbri, Niamsang, Lawkhla Mawlong, Lawkhla, Laitdiker, Laitniangthlong bad Mawliehpoh.
Ka jingmut ba kongsan jong ka jingïatreilang ka long ban ym peit tang ïa ki jaka jngohkai marwei-marwei, hynrei ban thaw ïa kawei ka kynhun kaba khlain kaba pynïasoh ïa ki shnong, ki jaka jngohkai bad ki lad sah jong ki nongwan kai.
Haba kren bad ki lad pathai khubor, u Sordar Shnong u la ïathuh ba kawei na ki rai ba kongsan ka long ban shna ïa ka Tourist Information Centre, kaba long ka jaka ban pdiang bad ai jingtip ïa ki nongwan jngohkai.
“Ka Centre kan lah ban ai jingtip shaphang ki jaka jngohkai, ki jaka sah, ki jaka ban leit kai bad kiwei kiwei ki jingdonkam jong ki nongwan kai. Yn buh ruh ïa ka rukom rejistar ïa ki nongwan jngohkai khnang ban pyntikna ïa ka jingshngaiñ jong ki,” ong u Chairman ka Committee.
Ha kane ka bynta, ka Committee kan ïatreilang ruh bad ka Police Department, khnang ban pynkhlaiñ ïa ka jingïatreilang ha ka liang ka jingshngaiñ.
Ka Committee ka pdïang sngewbha ïa baroh kiba kwah wan jngohkai sha ka thain, bad ka kyrpad ïa ki nongwan kai ban rejistar ha ka jaka ba la buh, khnang ban pynshngaiñ ïa ka leit ka wan jong ki.
Ka jingpyrshang jong ka Committee kam kut tang ha kaba khring ïa ki nongwan kai, hynrei ka don ruh ka thong ban pynmih ïa ki lad kamai kiba thymmai ïa ki nongshong shnong.
Ha kane ka bynta, la pynbeit ban pynshlur ïa ki nongshong shnong ban shna homestay, khnang ba ki nongwan jngohkai kin ïoh jaka sah bad ha kajuh ka por ki longïing shnong kin ïoh lad ban ïoh jingïarap pisa lyngba ka kam jngohkai.
La ïakren ruh halor ka jingdonkam ban pynkhlaiñ ïa ka rukom rep ha ka thain, khamtam ka rep organic ne rep khlem pyndonkam dawai, kaba lah ban long kawei na ki bynta jong ka jingwan jngohkai.
Ha kajuh ka por pat, u riewrangbah na ka thain, Bah Welbirth Rani, u la pynpaw ba katei ka thain ka don ïa ka mariang kaba itynnad bha kaban pynhun jrut ïa ki paidbah haba ki wan kais ha katei ka thain Mawsadang.
“Ki lum bad ki wah ba itynnad, khamtam ka wah kaba khuid bad sngur bha na ka jingsumar bad ka jingïada jong ki nongshong shnong kadei kaba khring tam ïa baroh nalor kiwei kiwei kiwei ki jaka ba itynnad,” u la ong.
Shuh shuh u ong ruh ba ka thong hi ka long ban pynbha shuh shuh ïa ka thain da kaba buh hakhmat pat ban pynbha shuh shuh ïa ka mei mariang bad ïa ka jingitynnad tynrai jong ka.
“Kawei na ki jingthmu ka long ban thung ïa ki syntiew kiba phuh ha manla ka aiom ban pynitynnad shuh shuh ïa ki shnong bad ki lynti leit kai,” u la ong.
“Ki tourist haba ki wan sha kine ki jaka jongnga kam dei satia ba ki kwah ban peit ïa ki ïing bun mala hynrei ki kwah ban peit ïa ka jingitynnad jong ka Mei Mariang,” la bynrap shuh shuh u Bah Welbeirth.
La ïathuh ruh ba ka Committee ka dang peit ruh ïa ki lad ban pynïar ïa ki jait jingïalehkai bad kiwei ki jingngewtynnad kaba ju khring ïa ki nongwan kai.
La ïathuh ba kum ka Committee ki la pynkhreh ban thied ïa ki motor boat ban ai lad ïa ki nongwan jngohkai ban shongkai halor ka wah.
Ka la mih ruh ka jingïakren wat ban pynbiang ïa ki jaka bam bad ki jaka shet bam khana na bynta ki longïing bad ki kynhun kiba wan jngohkai.
Katkum ka jingïathuh jong u Bah Wellbirth, ha kane ka thain ki don bun ki khyndew kur bad ki khyndew shimet. Ki trai khyndew, katkum ka jingpynpaw jong u Bah Welbirth, ki la pyni ïa ka jingkwah ban ïatreilang namar ki sngewthuh ba ka kam jngohkai ka lah ban wanrah ïa ka lad kamai.
Shuh shuh u la ong ba ka jingmih na ka kam jngohkai, lada ka nang roi, ka lah ban ïarap ym tang ïa ki trai homestay, jaka bam bad kiwei ki nongpynïaid kam, hynrei ïa ka shnong hi baroh kawei.
Ki nongïalam shnong ki la pynpaw ba ka pisa kaba mih na kine ki kam ka lah ban pyndonkam ban ïarap ïa kiba duk bad kiba kyrduh, ïa ki skul bad ïa ki khynnah kiba donkam jingïarap bad wat ïa kito ki longing kiba kynduh ïa ka pang ka shitom.
“Lah ruh ban pyndonkam ïa ka jingmih ban pynbha ïa ki skul, ban shna ïa ki ïing skul kiba biang bad ban pynkhlaiñ ïa ki jingdonkam jong ka pule puthi,” u la ong.
La pynkynmaw ruh ba dang shen ha ka tamasa pynmareh kulai ka la khring bun bha ki briew na shabar ka thain.
“Kumta, kum ka Committee ka kwah ba kum kine ki prokram kin long shi bynta ban khring ïa ki nongwan kai sha ka thain, khnang ba ki nongwan kai kin ym wan tang ban peit ïa ki jaka mariang hynrei kin ïoh ruh ban tip ïa ka riti ka dustur bad ka jingim jong ki nongshong shnong.”
Ha kajuh ka por, na ka liang u Sordar Shnong u la pyntip ruh ba ba kan sa don ka jingïakob niah kali lane ka Off-Road Challenge jong ka AHOR ha ka thain Mawsadang ha ka 15, 16 bad 17 tarik u bnai Risaw.
“Na ka liang ka shnong, la pynbeit ban shim bai rung 20tyngka shi khlieh, kaba long ka jingïarap na bynta ka Mawsadang Secondary School, kaba ka shnong ka kyrshan ha ka liang ka tulop jong ki nonghikai,” u la ong da kaba kyrpad ïa ki paidbah kiba wan sha kane ka prokram ban noh synñiang lang ban kyrshan ïa ka skul.
La pyntip ba ha kine ki sngi yn don ruh ki jingïalehkai bad ki prokram ha wah bad ha lum, kiba thmu ban pynsngewtynnad ïa ki paidbah.