Yn kyrshan borbah ka BHISHM Cube ban ïarap haba don ki jingjia shah lyngshop kiba heh ha ka thaiñ: Director NEIGRIHMS

Shillong, Nailur 24 : Ka jingdon jong ka BHISHM Cube ha NEIGRIHMS ka long kawei na ki sienjam kiba kongsan ban pynkhlaiñ ïa ka jingpynkhreh ïa ki jingjia ba sniew bad kiwei pat ki jingjia ha kaba bun ngut ki briew ki mynsaw ha kano kano thaiñ, la ong u Director ka NEIGIHMS u Nalin Mehta.
“Ka jinghikai ïa ki doktor, nurse bad ki nongtrei paramedical lyngba kum kine ki prokram kan pyntbit ïa ka jingtip jong ki ha ka liang technical, ka jingshaniah bad ka jingpynkhreh jong ki ban leh ei ei bad ïarap bha ha ki por jong ki jingjia bakyrkieh,” u la ong haba kren ha ka prokram pynsngewthuh paidbah “BHISHM REACT 2026”, kaba la pynlong ha ka 23 tarik Nailur.
U Mehta u la ai jingïaroh ruh ïa ka Casualty Department bad ka ophis jong u Medical Superintendent namar ka jingpynlong ïa kane ka prokram.
Ha ka CME la ïashim bynta da ki doktor jong ka Indian Army bad ka Sorkar Jylla, ryngkat bad ki nongtrei ka koit ka khiah jong NEIGRIHMS kaba la poi kumba palat 150 ngut ki nongïashim bynta.
Ka prokram ka la pynleit jingmut ruh halor ka jingpyndonkam mardor ïa ki BHISHM Cubes bad ka jingpynïaid ïa ki kam ha ki por jong ki jingjia bakyrkieh.
Ka BHISHM (Bharat Health Initiative for Sahyog, Hita and Maitri) Cube, kaba la tip ruh kum Aarogya Maitri Cube, ka dei ka kynja hospital kaba lah ban kit bad pynkynriah, kaba la shna ha ri India bad kaba lah ban pyndep mardor ha ki jaka ba don ki jingjia ba sngewsih. Ka dei ka jaka sumar bakyrkieh kaba lah ban trei hi dalade, kaba don ïa ki jaka puid kiba kongsan, defibrillators, portable ultrasound bad ki tent, bad kaba lah ban sumar haduh 200 ngut kiba mynsaw ha ka por kaba kongsan kaba la tip kum ka “golden hour” hadien ka jingjia.
Ka prokram ka la long shi bynta na ka jingïasnoh lang ïa ka “Swachhata Hi Sewa 2026” bad “Patient Safety Week 2026” ha North Eastern Indira Gandhi Regional Institute of Health and Medical Sciences (NEIGRIHMS), Shillong, kaba la sdang naduh ka 17 tarik Nailur.
Shi bynta na ka campaign Swachhata kaba neh ar taïew, ka NEIGRIHMS ka la pynlong ïa ka “Swachh PaathShala – Yuva for Swachhata” na bynta ki khynnah skul jong Leads Higher Secondary School, Nongmensong. Ki nongtrei bad ki khynnah skul ki la ïashim bynta ha ka jingïapynkhuid, kaba la bud da ka jingïakop poster ban pynsngewthuh ïa ki samla halor ka jingkhuid jingsuba.
La pynlong ruh ïa ka “Ek Din, Ek Ghanta, Ek Saath” bad ka “Jan Bhagidari Advocacy Drive” ban pynshlur ïa ki nongtrei bad paidbah ban ïashim bynta ha ki kam pynkhuid. Hapoh ka “Safai Mitra Suraksha Shivir”, la pynlong ïa ka jingai jingsumar ei na bynta ki nongpynkhuid bad ki dkhot ka ïing jong ki.
Ka campaign kan kut ha ka 2 tarik Risaw da ka “Swachh Bharat Diwas” bad ka jingïathung dieng ha ka campus.
Na bynta ka Patient Safety Week, ka Continuing Nursing Education Cell ka la pynlong ïa ki jingkren halor ka jingshngaiñ ha ka jingïoh dawai, ka jingrpyntip ïa ki jingjia, bad ka jingïashim bynta lang jong ki nongpang bad ki bahaïing jong ki, ban pynkhlaiñ ïa ka rukom treikam kaba burom ïa ka jingshngaiñ.
Kum ka dak ban pynpaw biang ïa ka jingkut jingmut ban trei na bynta ka jingkhuid, ka jingshngaiñ jong ki nongpang bad ka jingpynkhreh ïa ki jingjia bakyrkieh, ki nongïashim bynta ki la shim ïa ka Swachhata bad Patient Safety Pledge ha ka por jong ka prokram.