Shillong, Rymphang 15 : Ka Myntri Khynnah jong ka Sorkar Pdeng ba dei khmih ïa ka Tnat Social Justice and Empowerment, ka Pratima Bhoumik ka la plie paidbah ïa ka prokram ai jinghikai pyntbit ha ka sap treikam hapoh ka PM-DAKSH (Pradhan Mantri Dakshta Aur Kushalta Sampann Hitgrahi) Yojana, na ka bynta ki briew kiba don jingduna ha ki dkhot met ha nongbah Shillong mynta ka sngi. ïa kane ka prokram la pynlong ha Composite Regional Centre for Skill Development, Rehabilitation and Empowerment of Persons with Disabilities, Shillong.
Ka Myntri ka la sam ruh ïa ki NIRAMAYA Health Card sha ki nongïoh jingmyntoi. Ki la don 10 ngut ki briew na nongbah Shillong kiba la pynrung kyrteng na ka bynta ka prokram ai jinghikai ha kane ka jingïalang mynta ka sngi.
Ha ka jingai jingkren ha ka jingïalang ka Bhoumik ka la ong ba ka sorkar pdeng ka kut jingmut ban pynkup bor ïa ki briew kiba don jingduna ha ki dkhot met bad ka trei borbah ban pynurlong ïa ka thong jong u Myntri Rangbah duh ban ai jingshakri ïa baroh ki briew. Ka Myntri ka la ong ba kane ka jingkut jingmut ka paw shai na ka jingwan jngoh u Myntri Rangbah duh Narendra Modi ïa ka thaiñ shatei lam mihngi kumba 60 sien naduh u snem 2014, katba ka kynhun Myntri jong u ka la wan jngoh ïa ka thaiñ shatei lammihngi palat 450 sien. Ka jingjop ka long ka jingwan ka jingkylla ha ka thaiñ bad ka Tnat jong ka ruh ka la trei borbah ban plie lad ïa ki briew kiba don jingduna ha ki dkhot met na ka bynta ka roi ka par kaba kynthup lang ïa baroh.
Ka la ban jur ïa ka jingdonkam ka prokram ai jinghikai pyntbit ha ki sap treikam ban pynkup bor ïa ki briew kiba don jing duna ha ki dkhot met bad ka tnat jong ka, ka long kaba kloi ban ai kino kino ki jingïarap ba donkam na ka bynta ka bha ka miat jong ki. Ki sienjam ba la plie da ka tnat ki kynthup ïa ki kam wanrah jingkylla kiba pyni ïa ka jingpeit bniah ka Sorkar ban don ka imlang sahlang kaba pdiang lang ïa baroh, ka la bynrap. Ka sienjam ka pyni ïa ka jingïeng skhem ka DEPwD ban kyntiew ïa ka hok bad pyndonkam ïa ka teknoloji ban kyntiew ïa ka jingim jong ki briew kiba don jingduna ha ki dkhot met ha kylleng ka ri, ka la bynrap.
Ka la ai jingtip ha ka jingïalang shaphang ki bynta jong ki skhim ba la pyntreikam da ka Tnat na ka bynta ki briew kiba don jingduna ha ki dkhot met. Ka la ong ba ki briew kiba don jingduna ha ki dkhot met ki long ka bynta ba kongsan jong ka jingdon ki briew kiba la tbit ha ki kam bad ka sorkar pdeng ka kut jingmut ban tei ïa ka jinglong jingman kaba plié lad ïa ki briew kiba don jingduna ha ki dkhot met.
Ka la ïaroh ïa ki sienjam jong ka Composite Regional Centre for Skill Development, Rehabilitation and Empowerment of Persons with Disabilities (CRC- Shillong) ha ka jingai ki jingshakri ba bha sha ki briew kiba don jingduna ha ki dkhot met. Ka Myntri ka la ai jingïaroh kyrpang ïa ki jingai jingshakri jong ka centre sha ki briew kiba don jingduna ha ki dkhot met da kaba pynlong ïa ki jingai jingsumar bad ki jinghikai pyntbit na ka bynta ka jingïoh ïa ka jingkoit jingkhiah. Ka la ïakren bad ki briew kiba don jingduna ha ki dkhot met bad sngap ruh ïa ki khana jingjop ba ki la ïathuh. Ka Myntri ka la ïaroh ruh ïa ki sienjam jong ka sorkar jylla ban rah shakhmat ïa ki sienjam jong ka Tnat Social Justice and Empowerment jong ka sorkar pdeng na ka bynta ka jingmyntoi jong ki briew kiba don jing duna ha ki dkhot met ha ka jylla.
Ha kane ka jingïalang la ïadonlang ruh u Commissioner & Secretary sha ka sorkar Meghalaya, Tnat Social Welfare, Pravin Baksi, ka Commissioner for Persons with Disabilities Sabrella B Marak bad ki heh ophisar jong ka sorkar jylla.
