Shillong, Rymphang, 15: Kum shibynta na ka jingpynsngewthuh ïa ki paidbah kiba ñiah kali, la ka long ïa kiba ñiah kali kamai ne ki kali lajong bad kiba ñiah ïa ki ar shaka, khamtam mynta shi bnai, ha kaba ha ka Ri India hi baroh kawei la ñiew kyrpang kum u bnai ban ïakren halor ka jingshngaiñ ha ka leit ka wan da kaba ñiah adkar ïa ki kali, kaba la tip kum ka “National Road Safety Month,” u nongthoh khubor u la ïakren kyrpang bad u Superintendent of Police (Traffic), East Khasi Hills, u Kamakhya Prasad.
Ha ka jingïakren bad une u heh pulit u la phah ïa ka khubor sha baroh ki nongñiah kali, khamtam mynta ba la poi ka aïom long skul bad ba plie kiwei de ki jaka pule, ki nongñiah kali, la ki dei kiba ñiah kali kamai ne ki kali lajong kumjuh ki ar shaka ki dei ban long kiba adkar bad ban bud ryntih ïa ki kyndon jong ka shnat Traffic Police.
Ha ka jingïakren halor ki kyndon ñiah kali, u SP Traffic, u la ban jur ruh ïa kito kiba ñiah ïa ki ar shaka, ban long kiba don akor bad kim dei ban ñiah pynher sted shaba palat, ban ïaknieh ïaid shakhmat bad kawei kaba u la kham ban jur ka dei ruh ban phong ïa ki Helmet kiba skhem.
U la ban jur ïa ki kmie ki kpa kiba leit on lane leit shaw skul, ba ïa ki khynnah ruh dei ban pynphong Helmet ban lait na ki jingjia ba sngewsih.
Haba ban jur ïa kiba ñiah ïa kali, ki thuk-thuk ne ki scooty, u Kamakhya Prasad ula kyntu jur ruh ïa kito kiba ym pat kot sha ka 18 snem ka rta, ban ym pynkheiñ ïa ki kyndon ñiah kali, bad lada lap ïa kum kita kiba pynkheiñ ïa ka Aiñ, ym tang kiba u ne kaba ñiah ki ban shah daiñ kuna, hynrei wat ki kmie ki kpa ruh kin shah pynshitom lang kumjuh.
“Bunsien ngin lap ruh ba kine ki kyndon ki treikam tang hapoh sor, namar ka jingdon ki Pulit pynïaid kali ha kylleng ki jaka, katba yn ïaid pat kham sha kyndong, ba ka tnat Traffic Police kam lah shuh ban buh briew, kine ki kyndon kim treikam, khamtam ïa kiba ñiah ar shaka. Hynrei nangne sha khmat ka tnad Traffic Police ka la pyntreikam da kawei pat ka buit, kata ki pulit haba ki ïaid lynti shane shatai kin deng ruh da ki Spy Cam bad ynda ki la bishar bha bad lap ïa kiba pynkheiñ ïa ka aiñ, yn sa khot hajir ïa ki ryngkat bad ka kuna kaba heh. Wat ki riew paidbah kiba don kata ka jingsngew kitkhlieh na ka jingshngaiñ ki nongleit nongwan, ki lah ban shon dur ïa kiba pynkhein aiñ bad phah sha ki Pulit, ha kaba ki Pulit kin sa leh ïa kaba donkam,” la ong u SP (Traffic).
Ka mat kaba khatduh kaba une u heh pulit u la phah kyrwoh sha ki nongñiah kali, ka long ruh na ka bynta ka jingshngaiñ jong ki nongïaid lynti ha ki surok.
“Bunsien la ju sakhi, ba ki briew, kynthup naduh ki khynnah haduh ki rangbah, haba ki thmu ban jam na shiliang sha shiliang surok, lyngba u lain (Zebra Crossing) uba la buh kyrpang ban ïaid ki paidbah, hynrei kiba ki nongñiah kali kim ju ailad ïa ki briew ban jam sha shiliang, wat ha ki khep ba ki briew ki la poi hapdeng surok, kaba buh ha ka jinglyngngoh wat ïa ki Pulit pynïaid kali, la ka dei na ka daw ba ki nongñiah kali kim tip ïa ka jingmut jong u Zebra Crossing ne ka dei ka jingkhlem akor jong ki?” la ong shuh shuh u SP (Traffic).
