Shillong, Rymphang, 15: Ka Khun Hynñiewtrep National Awakening Movement (KHNAM) ha ka sngi Palei ka la dawa ïa ka Sorkar Jylla ba ka dei ban pynduh noh ïa ka ‘Personal Interview’ ha kaba ïadei bad ka jingpynrung kam ha ka Group-B, Group-C bad Group-D ha ki tnat treikam bapher bapher jong ka Sorkar Jylla.
Ki nongïalam ka seng ki la pynlong ruh da ka jingteh ïa ki banner hakhmat u durmot jong u Kiang Nangbah kum ka dak ban pynsngew ïa kane ka jingdawa sha ki tyndong skhor jong ka Sorkar MDA-2 ba ïalam da ka NPP.
Ha ka jingïakren bad ki lad pathai khubor, u Working President jong ka KHNAM u Bah Thomas Passah u la ong ba la shi snem mynta ka seng ka la phah ïa ka jingthoh sha ka Sorkar ban kyrpad ba kadei ban pynduh noh ïa ka ‘Personal Interview’ kaba pynlong ïa ka jingthungkam na ka bynta ki post ha ka Group-B, Group-C bad Group-D ha ki tnat treikam bapher bapher ka sorkar jylla hynrei ka Sorkar kam shym la sngap satia ïa kane ka jingdawa jong ka seng.
U la ong ruh ba Sorkar India naduh u snem 2016 ka ladep ban pynduh ïa ka ‘Personal Interview’ ha ki 23 tylli ki jylla ka ri India hynrei kaba lyngngoh ka long ba ka Sorkar Meghalaya kam pat lah satia ban bud ïa kane ka nuksa ba la leh da ka Sorkar India. Haba pynksan ïa kane ka jingdawa, u Bah Passah u la ong ba ka jingdawa jong ka seng ban pynduh noh ïa ka ‘Personal Interview’ ka long ban wanrah ïa ka rukom thungkam thungjam kaba khuid bad suba bad kaba bym don jingïashah liang ha kaba ki nongthep kam kim dei satia ban wad jingïarap na ki riewsaiñ ban ïoh ïa ka kam kaba ki la aplai.
