Shillong, Rymphang 15 : Pynkhreh ban ïa kyrïuh namar yn wan pynlynguh pum u nongrwai ba pawnam u Calum Scott ha ka 20 tarik Lber 2024 hangne ha nongbah Shillong kata ha Lariti Auditorium, Mawkasiang (New Shillong). Kane ka jingwan jongu sha kane ka nongbah ka long hadien ba u la dep ban ïa rwai lang bad u Ed Sheeran ha nongbah Mumbai ha ka 16 tarik Lber 2024 kaba dei shi bynta na ka Global Tour jongki.
U Calum Scott uba la bna nam ha ki sur rwai ba thiang jongu u la leit shang kylleng ka pyrthei ban ïarwai lang bad u Ed Sheeran. Kane ka jingkwah jongu ban wan sha kane ka nongbah ka dei hadien ba u la ïoh jingtip lyngba ki paralok jongu ïa ka jingitynnad jong kane ka nongbah khamtam ne ki paralok nongrwai lang jongu.
Ym lah ban len kane ka nongbah Shillong ka la khring ïa kiba bun ki nongrwai ba pawnam kum u Ronan Keating uba dang shu dep wan rwai dang ha u snem ba la dep. Ha ka por ba u wan sha kane ka nongbah u la ai ka jingïaroh shikatdei eh ïa kane ka nongbah bad ki nongshong shnong jongka bad u la ban jur ruh ïa kiwei ki paralok nongrwai jongu ba ki dei ban wan sha kane ka nongbah.
Kane ka jingwan sa u Calum Scott ka la nang rah ïa ka nam bad burom jong kane ka nongbah kum kata ka nongbah Rock Music. Kane ka dei ka concert kaba heh tam ban pynlong ha Lariti Auditorium kaba ngiam tang 1400 ngut ki nongwan sngap kumta kiba kwah ban ïohi da la ki khmat bad ioh sngew da la ki shkor ki dei ban thied kloi noh ïa ki tiket jongki tang mar ïa pyllait da ki nongpynïaid. ïa ki tiket na ka bynta kane ka Concert jong u Calum Scott lah ban ïoh naduh ka 17 tarik Rymphang ( Sngi Saitjaiñ) 2024 na ka rockskitickets.com. Kiba kwah tip kham bniah shuh shuh ki lah ban phone sha u bah Jason Manners 9774030587 lane ha ka Rockski EMG jason@rockski.
