Shillong, Nailur, 14: Ka Khasi Hills Autonomous District Council (KHADC) bad ka Karbi Anglong Autonomous Council (KAAC) ha ka sngi Palei ki la rai da kawei ka sur ban ïatreilang ryngkat ryngkat na ka bynta ban pynneh pynsah ïa ka shongsuk shongsaiñ ha ki shnong kiba hab hapoh ka Block II kaba don ha ka jingïakajia pud.
Ïa kane ka rai la shim ha ka jingïalang kaba la long hapdeng u CEM ka KHADC u Bah Pynïaid Sing Syiem bad u CEM ka KAAC u Dr. Tuliram Ronghang ryngkat ka jingdonlang jong u MP ka Karbi Anglong u Horen Singh Bey.
Ha kane ka jingïalang la ïashim bynta lang da ki Executive Member na baroh ar tylli ki Autonomous Councils.
Ha ka jingïakren bad ki lad pathai khubor hadien ba la wai ka jingïalang, u Bah Pynïaid u la ong ba ka KHADC bad ka KAAC ki la rai ban ïatreilang ryngkat ban pynneh pynsah ïa ka shongsuk shongsain hapdeng ki ar jaitbynriew kiba sah ha khappud.
U Bah Pynïaid u la pynpaw ruh ka jingsngewkhia halor ka jingshah pyndik jong ki paid Khasi kiba sah ha ka thain Block II.
“Naduh hynnin, nga ladep pynsngew ha u CEM ka KAAC halor kane kam bad kyrpad ruh ïa u ban tuklar lem khnang ba ki Khasi-Pnar kin ym shah pyndik khamtam haba ha ki ar tylli ki sorkar jylla ki dang don ha ka lynti ban ïapynbeit ïa ka jingïakajia pud,” u la ong.
Ha kaba ïadei bad ka jingdawa ban pynphai biang ïa ka Block II sha Meghalaya, u CEM ka KHADC u la ïathuh ba ïa kane ka kam ki ar tylli ki Sorkar ki dang don hapdeng ka jingïakren.
“Namarkata, ki ar tylli ki district council ki la rai ban ïatreilang. Ngin sngap ïa ka sur jong ki paidbah na baroh tylli ki jaidbynriew shwa ba ngin ai ïa ki jingai jingmut jong ngi sha ki regional committee jong ki ar tylli ki jylla,” u la ong.
Ha kajuh ka por, u Bah Pynïaid u la ïathuh ba ki ar tylli ki District Council ki la rai ban ïatreilang ban pynneh bad ban kyntiew ïa ka kolshor bad ki jingteinam uba menbarim jong ki ar tylli ki jaidbynriew.
