Sngew shyrkhei, khynnah 9, 10 snem ki la tip lut ïa ki kam jaboh, lap ka Child Rights Commission

Shillong, Nailur 14 : Ka Chairperson jong ka Meghalaya State Commission for Protection of Child Rights, Kong IM Syiem ha ka sngi Palei ka la ong ba bun kin lyngoh bad kyndit ban tip ba ki khynnah mynta ha ka rta kaba 9 snem, 10 ne 11 snem ki la tip lut ïa ki kam jaboh.
Ïa kane, ka Chairperson ka pypaw ha ka jingïalang ïa syllok bad ki Rangbah Shnong halor ka kamram kaba kum ki nongïalam shnong ki don na ka bynta ban tynrong lang ha ka jingïakhun ban peit ïa ka jingeh ba ki khynnah rit ki kynduh ha kane ka juk myntaq.
Da kaba ïathuh ba ïa kane ki lap ha ka jingleit ban ai jingpynshai ha kylleng ki skul kiba don ha ka jylla ka Kong IM Syiem ka ong ruh, “Shyrkhei teng teng, namar ngi ong kine ki khunlung kim pat tip ei ei dang 9, 10 bad 11 snem hynrei ki la tip ïa ki kam jaboh bad ki la ktah ruh ïa ki jingdih kiba sniew. Kaba khia bha mynta namar ki jingeh ki mih ki jait pa ki jait.”
Nalorkata, ka ong ruh ba ka por ka la poi kum ka Commission ki la hap ruh ban tynrong sa kawei pat ka kam, kata ban ai jinghikai lang wat ïa ki nonghikai ruh namar bun ki skul ki khot ban ïarap pynshai bad pynsngewthuh lang.
“Kawei na ki mat kiba ki nonghikai ki hap ban leh bad sngewthuh mynta ka long ka jingïaieit para kynthei para shynrang namar kum kita ruh ki don ha ki skul. Kumta bun ki nonghikai ki pynpaw ba ki la shem jingeh kumno shuh ban leh bad ki pan ka jingïarap na ka Commission,” la bynrap shuh shuh ka Chairperson.
Katkum ka jingong jong ka, ïa ki khynnah skul ki lah ban leit ai jinghikai tang shi klas hynrei mynta ki hap ruh ban pyrkhat pat wat na bynta ki kmie ki kpa nalor ki nonghikai.
Ha kajuh ka por ka la ïathuh ruh ki kynduh bun ki jingjia kiba ïadei bad ki khynnah kiba hapoh 18 snem kiba leh ïa ki kam ba long pyrshah ïa ka aiñ.
“Ki ïathuh ïanga ba mynshwa kiba ju sah ha ki juvenile home kidei kito ki khynnah rit kiba donkti ha ki kam tuh ba malu mala hynrei mynta pat kiba bun dei ki kam thombor ïa ka longrynïeng bad na ka liang ka commission ruh ka don ïa ka bynta da kaba trei lang bad ki kynhun bad ki tnad bapher bapher kynthup ia ki rangbah shnong bad ki kmie ki kpa,” ka la ong.
Ka Chairperson ka la ïathuh ruh ba dang shen ki la don kiba phah ïa ki video ba kyllon ki khynnah ha ki prokram rakhe Independence Day namar ba ki la thait. Kumta, ka ong ba katei ka dei ka kamram jong ka Commission ban thoh sha ka tnad ban kylli bad lada kim don ïa ki kyndon (guidelines) na ka liang ka Commission kan ai ne syllok lang ne ïarap kumno ban leh la kadei ban pynbiang tupia, ne ka bam mynstep bad kiwei kiwei.
Ha kane ka prokram la ïoh ruh ïa ka jingpynshai na ka liang ka Faith Foundation, kumjuh na ka Child Friendly Shillong BIDS ha kaba ki Rangbah Shnong ki ïoh ïa ka lad ban kylli bad ïoh jingshai ruh halor kiba bun ki mat.
Ïa kane ka jingïasyllok la wan ban plie da ka Director jong ka tnad Social Welfare, Kong CD Lyngwa ryngkat ka jingdonlang ka Kong MA Kharbhih, Member Secretary ka MSCPCR, Fr. Genesius Wanniang Executive Director BIDS bad kiwei kiwei.