Rai ka ïingbishar ban bteng ïa ka jingïoh jamin ki nongïalam ka HITO
Halor ka jingujor ejahar 3 ngut ki Magistrate
Shillong, Nailur 14: Ka ïingbishar u Additional Sessions Judge, Shillong, u Bah I. Rymbui, ka la bteng ïa ka anticipatory bail jong ki san ngut ki nongïalam ka HITO kiba la shah ujor ehajar ha ki lai ngut ki Additional District Magistrate halor ka jingjia kaba la jia ha ka 4 tarik mynta u bnai haba la mih ka jingïakulmar hajan ophis DC Shillong.
Ka Anticipatory Bail, kadei ka jingshim jamin lypa shuwa ban shah kem. Napdeng ki san ngut ki nongïalam ka HITO kiba la shim Ka Anticipatory Bail, ki kynthup ïa u Bah Donbok Dkhar, President bad u Bah Sahaniah Nongrum Legal Secretary ka Seng.
Ki lai ngut ki ADM kiba la ujor ejahar ki long u Bah S. Warjri, MCS, Bah R. Wahlang, MCS bad i Kong B. Pakynteiñ, MCS da kaba kynnoh ba kine ki la pynkheiñ ïa ka kyndon 144 CrPC, nangta ki la ïalum haduh 50 haduh 60 ngut ha ka jaka kaba khlem da pan jingbit kata haba ki la ïalum ha jaka pynïeng kali ka Municipal hajan SBI Shillong. Nangta ki la tur bun ngut sha Sadar Police Station ryngkat ka jingpyrta pyrshah ïa ki Pulit, wat haba na ka liang ki Pulit ki khot hajir tang ïa u President. Ki la kynnoh ruh ba ki la ïaid paidbah ban tur jubor sha Main Secretariat da kaba thom da ka bor ïa ki Magistrate bad ïa ki Pulit bad thaw jingkulmar ruh ha lynti lynti shuwa ban poi hajan ophis DC.
Na ka liang u nongsaid aiñ ka HITO pat u Bah Lurshaphrang Shongwan, u la ong hakhmat ka ïingbishar ba ki nongïalam ka HITO ki la ïatreilang bad ki Pulit haba kila shah khot hajir da kaba ki la leit mih hakhmat ki Pulit. Nangta ha kaba ïadei bad ka jingtur sha Main Secretariat ruh ki la leit da kaba jai jai da ka jingthmu ban shu leit buh ïa ki Placard ha phyllaw jong ka Secretariat. U Bah Lurshaphrang, u la ong ruh ba dei ka jingpyndonkam ki Pulit da ka bor ba ka samih ka jingïakulmar ha katei ka sngi.
Ka ïingbishar pat ka la pynpaw ba ki Pulit kim shym la leh thikna ha kaba ïadei bad kane ka kam namar ka Case Diary jong ki kam long kaba shai bad kaba lymmuh bad kam don ki jingbuh rekod kiba biang.
Kumta ka la ai hukum ban bteng ïa ka jingïoh jamin ki san ngut ki nongïalam ka HITO katab ym pat dep ka jingtohkit ki Pulit, tangba ka la buh kyndon ka Seng HITO kam dei shuh ban leh kijuh ki kam kiba ka la leh ha ka 4 tarik mynta u bnai.