Rai ka ACHIK ban bteng ka shah jingit haduh ban da khot ïakren u CM

0

Shillong, Naitung 16 : Ki nongïalam ka Achik Conscious Holistically Integrated Krima (ACHIK) bad Garo State Movement Committee (GSMC) – kata u Laben Ch Marak bad Balkarin Ch Marak, ki la rai ban bteng ïa ka jingshah jingit tad haduh ba u Myntri Rangbah ka Jylla Conrad K Sangma, un khot ïa ki ban ïakren halor ka jingdawa pyntreikam ïa ka backlog policy bad winter capital ha Tura.
Ha ka kyrwoh ba pyllait mynta ka sngi U Blei, u Laben uba dei u Ophisar barim ka Sorkar bad Nong ïalam ka ACHIK ula ong ba ma u lem bad u Balkarin, Co-Chairman ka GSMC kin bteng beit ïa ka jingshah jingit tad haduh ba u Myntri Rangbah un khot ïakren halor ki jingdawa.
Kine baroh arngut ki la ong ha ki 6 sngi ka jingshah jingit bad kam pat shym la don satia kano kano ka jingaiktien na ka Sorkar ne ka kynhun ki Doktor ban peitthuh ïa ka koit ka khiah jongkine ki arngut.
Une u Nongïalam ka ACHIK u la pyntip ba ka jingwan ïashimbynta lang jong ki paidbah ka la nang bun katba nang ïaid ki sngi bad pynbna ruh ba ma u lem bad u Balkarin kin nym mynjur ïa ka em kum ka jubab.
Ula ong ba ka koit ka khiah u Balkarin ka la nang troiñ hynrei ula ïengskhem ban ïakhih haduh da jaw lut ka snam na ka bynta ban pynïoh ïa ka hok bad ka bhah jong ki Garo.
U Laben ula ong ba ki kyrmen ba ka Sorkar kan sa pynsngap lem ïa la ki skhor ïa kine ki jingdawa kiba la sahteng jong ki paidbah ka Ri-lum Garo.

Leave A Reply

Your email address will not be published.