Shillong, Kyllalyngkot 08 : Ka Umpling SC ka la ïohrah ïa ka namlahduh hadien ba ka la lah ban pynliem ïa ka Mawsiatkhnam A da 1-0 ha ka final jong ka Inter Dong ba la pynïaid da ka Umpling Umjathang Sports Club ha madan Umpling Umjathang, Mawsiatkhnam ha ka 5 tarik u Kyllalyngkot, 2023.
Ïa ki khusnam sha ki nongjop ha kane ka sngi la sam da u rangbah shnong ka Mawsiatkhnam u Bah Shemphang Wahlang.
Ha kane ka inter dong ba ar sngi la don haduh 12 tylli ki kynhun ba la shim bynta na ki dong bapher bapher kiba don ha Mawsiatkhnam.
Hashuwa kane ka final la don lang u MLA ka Mawlai konstitwensi Bah Process T. Sawkmie uba la ai khublei ïa baroh ar tylli ki kynhun ïalehkai final ha ka jingdon ryngkat u rangbah shnong Mawsiatkhnam, ki rangbah dong, ki nongïalam UDP Mawlai Circle bad kiwei kiwei.
Ha kane ka sngi u Bah PT Sawkmie u la ïoh ban plie ruh ïa ka madan kaba u la mang na ka MLA skhim 4 lak tyngka ban pynheh ïa ka madan kaba dong Umling Umjathang.
Haba ai jingkren ha kane ka sngi u MLA u la pynpaw ïa ka jingkmen ba u la ïoh ban pynurlong ïa la jingkular bad haba ïa dei bad kane u la ai ïa ka burom baroh sha U Blei uba la don ryngkat bad u ban pynurlong ïa ka jingthmu.
