Ther u MR ïa ki Nongïalam ba wohdong bad pynkylla ishu ïa ki kam pynroi sha Ri-lum Garo

By Mawphor News Desk On Jan 8, 2023

Shillong, K’lyngkot 07 : U Myntri Rangbah ka Jylla Conrad K Sangma mynta ka sngi saitjain, ula ther tyngeh ïa ki katto katne ki Nongïalam kiba kiba wohdong bad pynkylla ishu ïa ki kam pynroi bala ai da ka Sorkar sha ki paidbah ka Ri-lum Garo.
U Myntri Rangbah ula kynthoh ïa kane halor ki jingkynnoh ba ïadei bad ka PA Sangma Sports Complex ha Tura, West Garo Hills District.
“Ka long kaba sngewsih ba katto katne ki Nongïalam kila pynlong ishu khamtam haba ki paidbah kila ïoh ïa ki kam pynroi. Ka paw pynban ba kine ki Nongïalam kiba kren ïa kane khamtam ki Nongïalam na ka thaiñ kiba kren ïa kane, ki dei ki briew ki bym kwah ba ka kam pynroi kan wan ha Tura. Kim kwah ba ki kam pynroi kin wan sha Ri-lum Garo jong ngi, kim kwah ba ka roi ka par kan wan sha Meghalaya bad dei namar kata haba ki ïohi ïa ka jingwan ki kam pynroi, kila pynmih ïa ki jingkynthoh pyrshah..ka long kaba sngewsih” ong u Conrad haba ïakren bad ki nongthoh khubor.
U Nongïalam ka BJP bad MDC ka Tura Bernard N Marak, dang shen ula buh jingkylli ïa u Myntri Rangbah ka Jylla Conrad K Sangma halor ka rai ban plie ïa ka PA Sangma Stadium namar ba ka dei ka project ka bym pat dep pura.
Haba kylli, u Myntri Rangbah ula ong ba kane ka project ka don arbynta-ka bynta ba nyngkong ka dei ka stadium phutbol bad kaba ar dei ka Indoor Stadium.
Ula pynshai ruh ba ka Indoor Stadium ka dei ka bym pat sdang bad namar kata tang ïa ka bynta ba nyngkong jong ka Stadium phutbol ka dei kaba la lah ban pyndep.
“Kam sngew ïahap ïa ngi ban khot kat ïa u Myntri ka Sorkar khlem da pyndep ïa ka bynta kaba ar. Hynrei namar ka bynta ba nyngkong ka dei kaba la dep, lada phim plie noh, yn ym lah satia ban pyndonkam bad namar lada ym plie noh bad shu buh kan sa shu jot ei. Na kata ka daw, haba buh ha ka jingmut jingpyrkhat ba ka project kam pat dep pura namar ba dang sah ka Indoor Stadium, kam sngew ïahap ïa ngi ban khot ia ki Myntri na ka Sorkar Pdeng. Namar kata, kum u Myntri Rangbah ka Jylla, nga la plie hi bad kane ka ju jia ha kiba bun ki prokram. Kum ka nuksa, mynta ka sngi nga la plie ïa ka JJM scheme ha kiba bun ki jaka bad kam long kaba ïahap ïa ngi ban khot ïa ki Myntri na Delhi tang namar ka JJM” ula ong.
U Conrad ula ong ba ka jingkylli kam mih satia ba la pynkhun ïa ki paia haba bynrap “Ka dei ka World Class Stadium kaba la shna bad ka dei ruh kaba nyngkong eh ha ka thaiñ Shatei Lam Mihngi bala shna da ka prefab structure”.
“Lada u ( Bernard) u thew sha ki jingpynkhun kiba don ha ki mawkyndon shadien jong ka stadium ïa kaba nga antad ba ka dei, kane ka dei ka rukom ba kumno ki mynkyndon kin long. Kam dei satia ban long kaba beit bad ka dei ban ïaid khun…Lada u kdew ïa kane, kane ka dei kaba la tei kat kum ka jingpynwandur ne ohdur” ong u Conrad.