Bthah u Justice (Retd) Vaiphei ïa u PCCF ka Assam ban ai jubab halor ka jingjia ha Mukroh

Shillong, K’lyngkot, 07: U Justice (Retd) T. Vaiphei uba khlieh ïa ka jingtohkit halor ka jingjia ha ka shnong Mukroh, West Jaiñtia Hills District u la phah da ka jingthoh sha u Principal Chief Conservator of Forest (PCCF), Assam ban ai jubab halor ka jingjia ha Mukroh hadien ba um shym la lah satia ban ai ïa ka jubab ha u Nohprah jong u snem baladep.
Ha ka 6 tarik mynta u bnai, la pynlong ïa ka jingshong bishar da kaba ïatai halor ka kaiphod ba la phah da ki Director General of Police (DGP) na ka jylla Meghalaya bad Assam halor kane ka jingjia.
Ïa u Deputy Inspector General of Police jong ka Jylla Assam la bthah ba un phah ïa ka kaiphod ha lane shwa ka 20 tarik, mynta u bnai hadien ba ka Commission ka la kdew ba ka don ka jingduna ha ka affidavit.
Ïa kane ka mat yn sa shong bishar sa shisien ha ka 20 tarik mynta u bnai.
Ka Justice Rumi Kumari Phukan, ka nongbishar ba la shongthait jong ka Guwahati High Court, ha ka 28 tarik, Nohprah, 2022 ka la hiar jurip ïa ka shnong Mukroh, ha kaba hynriew ngut ki briew ki la duhei ïa la ka jingim ha ka jingsynreit kuli jong ki Pulit bad ki nongpahara khlaw ka Jylla Assam kaba la jia ha ka 22 tarik, Naiwieng, 2022.
Ka Phukan kaba la khlieh ïa kane ka jingtohkit halor ka jingjia ha ka shnong Mukroh ka la leit jngoh ruh ïa ka shnong Dongkamukam, West Karbi Anglong ban tohkit halor kane ka jingjia.
Ha kane ka jingleit iuhkjat, ka la ïakynduh ïa ki bor pulit, ïa ki nongtrei ka tnat khlaw bad ïa ki nongïalam shnong.
Ka jingïalang kaba la long ha ka Inspection Bungalow (IB) ha ka shnong Donakaukam kam shym la long kaba seisoh namarba ïa kane ka jingïalang la shu khot pynlong tang ha i por ba lyngkot.
Katkum ka tyllong khubor, ka Karbi Students Association (KSU) ka la kyntu ïa ka Commission ban pynlong biang sa shisien sa kawei ka jingpynsngew paidbah bad ban ailad ruh ïa ki paidbah ban kren, khamtam ïa kito kiba don ha ka por ba la jia ka jingsiat kuli ha ka shnong Mukroh.
Bun na ki kynhun bapher bapher ki la dawa ban pynjlan ïa ka jingpynlong ïa ka jingpynsngew paidbah ïa kaba la buh ban pynlong ha ka 9 tarik mynta u bnai.
Ka Sorkar Assam ha ka 23 tarik, Naiwieng, 2022 ka la thung ïa ka jingtohkit ba marwei ba la khlieh da ka Phukan bad ka Commission ka la buh ïa ka 27 tarik, Nohprrah, 2022 kum ka tarik ban pynlong ïa ka jingpynsngew paidbah da kaba khot ïa ki briew lane ki kynhun kiba don jingtip shaphang ki jingshisha ban wan mih bad ban ai jubab sha ka Commission ha ka shnong Dongkamukam, West Karbi Anglong.