Pynbna u Conrad ïa ka kyrteng u Bah Hamlet kum u kyrtong ka NPP na Mylliem Constituency

Shillong, K’Lyngkot 07: U National President ka National People’s Party, Conrad K Sangma ba dei ruh u Myntri Rangbah ka Jylla ha ka sngi Saitjaiñ u la pynbna ïa u Bah Hamletson Dohling kum u kyrtong ka NPP na Mylliem Constituency ha ka elekshon ban long shen mynta u snem.
Lah ban kdew hangne ba u Bah Hamlet u dei u MLA ka PDF na Mylliem bad Myntri ka tnad C&RD ka sorkar jylla ha shwa ba un resaiñ noh ha ka 05tarik mynta u bnai.
Ha kane ka sngi pynbna kyrtong, la pdiang sngewbha ruh ïa u Bah Hamlet da u President ka NPP Meghalaya Dr. WR Kharlukhi, Bah Sniawbhalang Dhar, Dr. Ampareen Lyngdoh, Dr. Don War bad bun kiwei kiwei ki nongïalam.
Ha kane kajuh ka sngi u Conrad u la pdiang burom ruh ïa ki lai ngut ki nongïalam ba hakhmat eh jong ka People’s Democratic Front (PDF) ba kynthup naduh u President barim, Bah Ivanlumlang Marbaniang, nangta u Chief Organiser Bah Dipshon Ryntathiang bad ruh u General Secretary barim ka party Bah Emlang Lytan kiba la iehnoh na ka party PDF ryngkat bad u Bah Hamlet ban jied noh ban don bad ka NPP.
Shwa kane u Conrad u la pyllait paidbah ïa ka kaiphod treikam jong u Bah Hamlet Dohling kaba la kdew lut ïa ki jingtreikam bad kiba bniah kum u nongmihkhmat ha kine ki san snem.
Na ka liang ka MLA jong ka Shillong East kaba dang shu dep resaiñ shen, Kong Ampareen Lyngdoh ka la ai ka jingïaroh ïa u Bah Hamlet uba la lah ban ai ka jingkheiñ thik pa thik sha ki nongthep vote halor ka jingtreikam jong u ha kine ki san snem.