Shillong, K’lyngkot 07: U nongaiktien ka BJP u Bah M Kharkrang ha ka sngi Saitjaiñ u la ong ba ka jingpyrshang ka TMC ban khroh Vote ïa ki samla lyngba ka Mye Card kaba ka TMC ka kuklar ban ai man u bnai 1000 tyngka sha ki samla ka jylla kan long kum ka jingknieh noh ïa ka jinglaitluid ki samla namar kin shaniah tylli beit ha ka jingisynei ki politishian bad ong ruh ba kane ka jingleh jong ka ka long kumba ka la buh dor lupa ïa ka vote ha ka dor ba 1000 tyngka.
U la ong ba kane ka jinghikai kaba ka TMC ka wanrah, ha kaba kan ai 1000 sha ki samla man u bnai ka long beit kum ka jingai dohkha ïa uba kwah dohkha hynrei u ong ba k BJP hi ka don ka nongrim ba haba don ba kwah dohkha ka BJP kan hikai ban khwai dohkha ba kin ïoh dohkha lynter.
U la ong ruh ba ka jingkular ban pyntreikam ïa kane ka skhim ynda ka wan ha ka bor ka long kaei kaei pat kaba ym ju jia koit ba naduh shuwa ka elekshon ba ka party ba kular kan shim jingkheiñ lupa na bynta ki nongïoh jingmyntoi katba ïa ka jinglut pat yn hap ban bei na pla tyngka jong ka sorkar.
“Kat kum ka jingkheiñ jong ka TMC ki don 4.16 lak ki samla bym ïohkam ïohjam kiba ka kular ban ai 1000 tyngka shibnai bad kane ka jingai ba 1000 kan ym lah satia ban aikam ïa ki samla bad kane hi kaba mut ba ka TMC ka kwah ban teh kynjri beit ïa kine ki 4.16 lak ki samla hynrei watla ka TMC ka la buh dor ïa ki samla bad ki paidbah ka jylla ngi ngeit ba ki paidbah ki long kiba stad ym ban shah thied ha kane ka buit shukor ka TMC,” u la ong.
