Shillong, K,’lyngkot, 07: Ka Meghalaya Trinamool Congress kaba la pynbna dang shen ïa ka We Card ban siew shi hajar tyngka shi bnai sha ki kynthei ha ka jylla Meghalaya, sa mynta ka kynti, ka TMC ka la khroh sa ïa ki samla da kaba pynbna paidbah ïa ka Meghalaya Youth Empowerment (MYE) Scheme.
Ïa kane ka skhim la pynbna paidbah ha ka jingïalang kaba la long ha Pine Wood Hotel, Shillong da u State President jong ka TMC u Bah Charles Pyngrope ha ryngkat ka jingsakhi lang jong u Nongïalam ka Trinamool Congress Legislature Party u Dr. Mukul Sangma bad u Opposition Chief Whip jong ka Iingdorbar Thawaiñ u Bah George B. Lyngdoh bad kiwei kiwei ki nongïalam ka TMC.
Lyngba kane ka skhim, ka TMC ka la kular ban ai jingkyrshan pisa T.1000 shi bnai (12 hajar shi snem) sha baroh ki samla ki bym pat ïohkam ïohjam jong ka jylla hapdeng ka rta kaba 21 snem haduh 40 snem ka rta bad nalor kata ka TMC ka la kular ruh ban pynïohkam haduh 3 lak ha ki san snem ki ban sa wan.
Manla ki samla ki bym pat donkam, kiba don hapdeng ka rta kaba 21-40 snem bad kiba long ki nongshong shnong jong ka jylla Meghalaya, ki lah ban pynrung kyrteng ïalade badn ïoh ïa kane ka skhim. Ki samla kiba la pynrung kyrteng kin sa ïoh ïa ka Unique ID MYE Card ka ban pynthikna ba kin dup ïoh ïa ka jingkyrshan pisa kumba ka TMC ka la kular.
Nalor kaba kular ban ai jingkyrshan pisa kaba manla u bnai, lyngba ka MYE Scheme yn pynkha ruh sa 3 lak tylli ki kam ha ki san snem ban sa wan da kaba aikam ïa ki nongshong shnong lyngba ka Mission Mode. Ka TMC ka la buh thong ban wanrah ïa ki lad ba thymmai da kaba pynsdang ïa ki polisi treikam, ban pynkhlaiñ ïa ki kam jngohkai pyrthei bad ban wanrah ruh ïa ka roi ka par ha ka jylla.
“Ka Meghalaya Youth Empowerment Card kan long ka dur ba shisha ka ban pynkupbor namarba kan pynkynkynmaw ïa ngi haduh katno tylli ki kam ngin sa pynkha. Hato phi ngeit ba tang 23,200 ngut ki briew ki im khlem kam khlem jam bad kiba la rejistar katkum ka jingbuh jingkheiñ jong ka sorkar? Em kam dei. Kane ka dei ka jubanlak kaba ar, ba kum ka Party, ngi la ai sha ka Jylla,” ong u Dr. Mukul haba kren ha kane ka jingïalang.
“Ngi la ïalum lang hangne, ban pynbna paidbah ïa ka skhim kaba kyrpang. Kane ka skhim ka pynthikna ban pynkha 3 lak ki kam. Kin sa don ki ban kylli, hynrei ka jingangnud jong ngi ka long ban kynjoh sha ka thong namarba kum ka party ngi la pynkhreh bha ïalade ban pynurlong ïa kane ka jingthmu,” ong u State President jong ka Meghalaya TMC u Bah Charles Pyngrope.
Ki nongïalam ka TMC ki la batai ruh ba ka jingphiel jong ka Sorkar MDA ban pynkha ïa ki lad ïohkam lane ban aikam aijam ka la pynlong ïa ki 37% ki samla ban shong khlem kam ha ka jylla. Ka jingdon jong ki briew kiba shong khlem kam ha ki nongkyndong ka long 42% bad ha ki jaka sor ki long 20% na ka jingbun briew ha ka jylla. Kane ka ka la ktah beit beit ïa ki longiing longsem namarba ha ka jylla Meghalaya ka jingap bam ka kiew (65.9) ha ka ri.
Ka Meghalaya TMC ka la bthah ruh ïa ki nongtrei jong ka party ban sa pynlong ïa ka jingrung sha manla ki thliew iing ban pyntip paidbah ïa kane ka skhim sha ki paidbah ha ki sngi ban sa wan.
