Por elekshon ki beiñ, tang shu dep ki wan sdien ha ka bos u Conrad: Dr. Ampareen Lyngdoh

Shillong, K’Lyngkot, 07: Ka nongai ktien jong ka NPP ba dei ruh ka MLA ba dang shu resaiñ shen kum ka MLA Shillong East, Dr. Ampareen Lyngdoh ha ka sngi Saitjaiñ ka la ong ba ka i lyngoh haduh katta katta ban ïohi ba ha ka por elekshon ki thalaiñ ki kynthoh hynrei da la dep ka elekshon pat ki wan snoh ha ka bos u Conrad Sangma.
“Nga i lyngoh ba ha ka por elekshon ki thalaiñ pyrshah ha ki rynsan ïalap elekshon jong ki tangba da la dep ka elekshon pat ki wan sha ka bos u Conrad Sangma ha kaba da ai tang ban shu ieng (footboard) ruh kin snoh,” ka la ong haba kren ha ka jingïalang pdiang burom ïa u Bah Hamlet Dohling sha ka NPP ha ka jingïalang kaba heh bha kaba long ha madan Umlyngka.
Katei ka nongai ktien jong ka party ka ong ruh ba ki paidbah ki dei ban tip ba kaei kaba pynlong ïa kiba bun ngut ki MLA ban resaiñ na ka jinglong MLA bad ban leit ïasoh sha ka NPP.
“Lada ym don ki 10 bad 11 ngut ki MLA kum manga bad Bah Hamlet ban leit tylli kawei sha ka NPP hato ngin ïoh ïa ka sorkar kaba khlaiñ ha u 2023. Hato ngim pat thait kum ki paidbah ka jylla ban shu long ‘samkhmut ha ki nongïalam ba wan na shabar jylla,” ka la bynrap shuh shuh.
Haba pynshai ïa ka daw ka jingmih noh naka Congress, ka Kong Ampareen ka la ong ruh ba hadien ba ka Congress ka la pra phum ym don satia ki nongïalam na Delhi ban tuklar bad mynta la sah sa tang ka lieng. “Hato ngin shong marwei ha i liengkynda ha kat kane ka jingdonkam ïa ka sorkar kaba skhem ha u 2023. Hato kam la biang seh ba hadien 50 snem ngin ïalam noh da ka party na la ka jong ka jylla ïa ka jylla,” ka la ong.
Katei ka nongmihkhmat ba la jop bunsien na Shillong East ka la ong ruh ba naduh Rilum Jaintia, Ri Bhoi bad ha West Khasi Hills ki party ki paidbah ki pynjop beit tang ïa ki ar tylli ki party ym kumba long ha East Khasi Hills kaba na ki 16 – 18 tylli ei ei ki constituency ki la don pat haduh kumba 11 tylli ki party.
“Kadei hok ïa u Bah Hamlet ban wan sha ka NPP. Hato phi kwah ba u nongïalam jong phi un wan tang marwei da ka scooter bad dei na kata ka daw ngi kwah ba haba leit dei ban leit lang da ka bos kaba heh.”
Katei ka heh NPP ka la ïaroh ruh ïa ka rai rangbah bad ka sienjam ba la shim da u Bah Hamlet da kaba mih noh na ka PDF bad ïasoh sha ka party kaba heh kum ka NPP na ka bynta ban ïoh ïa ka sorkar kaba khlaiñ bad synshar hi tang marwei ha u 2023.
Ha kajuh ka por ka ong ruh ba lada kren ïa ka jingshisha, ym pat ju ïohi ba ha rilum Garo ki nongïalam kin shah lyngshop ne shah kynthoh kumba shah leh ki nongïalam ha rilum Khasi.