Rah ka TDCA ïa ka nam lahduh ha ka Under 15 Boys Inter District Cricket Tournament ka SCA
Nongpoh, Ïaiong 05: Haba pynkut noh ïa ka Under 15 Boys Inter District Cricket Tournament ba la pynlong da ka Meghalaya Cricket Association bad ba la pynïaid da ka Ri Bhoi District Cricket Association ha Madan Umbuda ha Ri Bhoi, ka kynhun ïalehkai na Tura ba la tip kum ka Tura District Cricket Association ka la ioh ban rah ïa ka nam lahduh hadien ba ka la pynliem noh ïa ka kynhun ïalehkai ka Shillong Cricket Association da 4 wickets.
Ïa kene ka lympung ïalehkai Cricket la pynlong ha Madan Umbuda ha Ri Bhoi District bad mynta ka sngi ka la poi noh sha kaba kut, ha kaba kitei ki ar tylli ki kynhun, ka Shillong Cricket Association bad ka Tura District Cricket Association ki dei ki kyhun kiba ïa aireng ban ïa knieh ïa ka nam lahduh jong ka tournament.
La wan ruh ban pynhap pyrda ïa kane ka Cricket Tournament ka Shillong Cricket Association da u President, u Naba Batacharjee kum u kongsan bad la sakhi lang ruh naduh ka jingdon lang u Secretary ka Shillong Cricket Association, u Bah Gedion Kharkongngor, u President ka Ri Bhoi District Cricket Association, u Bah Rayonald Kharkamni bad kynthup kiwei kiwei ki dkhot ka Shillong Cricket Association bad na ka Ri Bhoi District Cricket Association.
Haba phai sha ka ka jingïalehkai test kaba ar sngi hapdeng kine ki ar kynhun, ka kynhun ïalehkai ka Shillong Cricket Association ka la ioh ïa ka kabu ban tied nyngkong ha kaba ha ka first inning ka la ioh ban khur haduh 101 run na ka 29.3 over bad hap lut baroh 10 wicket.
Na ka liang ka kynhun ïalehkai ka Tura District Cricket Association haba beh ïa kitei ki run ba la khur da ka Shillong Cricket Association ka la ioh ban kamai haduh 110 run na ki 38.5 over bad hap lut baroh ki wicket.
Haba phai pat sha ka jingïalehkai jong ka 2nd inning, ka SCA ka la ioh ban tied haduh 101 run na ka 37.3 over bad hap baroh ki wicket bad ka TDCA kaba beh ïa katei ka run ka la ioh ban tied tang 96 run na ki 26 over bad duh noh 6 wicket. Haba khein kyllum pat ka TDCA ka la ioh khur ïa ka nam jop da kaba ka la pynliem noh ïa ka SCA tang 4 wicket.
Ki rangïalehkai kiba la leh bha ha kane ka tournament ki kynthup ïa u Dipayan Nandi u la ioh khur 48 run na ki 47 ball, u Silgrim B. Marak u la ioh ïa ka nam ba ar ha ka jingkamai ruh kaba u la ioh khur 32 run na ki 55 ball. U Ben-haden N. Marak u la ioh khur 29 run na ki 17 ball ha ka kyrdan balai kum ki nongtied ball. Haba phai pat sha ki rang ïa kawang ball, u Gaurav J Thakuria u la wan ha ka kyrdan ba nyngkong ha kaba u la kawang 11.5 over bad pynhap 5 tylli ki wicket, u Manthan Gupta u la wan ha ka kyrdan kaba ar, da kaba kawang ball haduh 15 over bad pynhap 4 tylli ki Wicket bad bud sa u Ben-haden N. Marak u la kawang 9 tylli ki Over bad khur 4 tylli ki Wicket.
Na ka liang ka Meghalaya Cricket Association kum shi bynta ban pynshlur ïa kine ki rang ïalehkai hapoh ka 15 snem ban kin dang kiew ha ka kam ïalehkai Cricket ka la ai sam ruh da ki khusnam (Trophy) sha kine ki ar tyllli ki kynhun bad kynthup ruh ki khusnam shimet bad ki medal sha baroh ki rangïalehkai.