Da ka prokram ba kyrpang ia kiba thut dkhot met pynlong ka Ephphatha Society bad San-Ker ha EJHD

Khliehriat ïaïong 5 : Ka Ephphatha Society ha ryngkat ka jingïatreilang bad ka San Ker Rehabilitation Centre mynta ka sngi ka la pynlong ïa ka jingsam dawai ei ïa kito kiba don jingduna ha ki dkhot met, kumjuh ruh ïa kito kiba shah ktah ha ka bor pyrkhat, ïa kane ka prokram la pynlong ha Ephephatha Society Centre ha Dkhiah, East Jaiñtia Hills District ha kaba u Director jong ka San Ker Rehabilataion Centre, u Dr S. Syiem lem bad kiwei kiwei ki doctor ki la wan ban ïa snohkti lang ha kane ka prokram.
U President jong katei ka Society, u bah E.S.Sapuh, ha ka jingkren maitphang, u la ïathuh khyndiat ha kaba ïadei bad ka Ephphatha Society, la ong ba ïa kane ka Society la seng ha u bnai nohprah jong u snem 2020, ka jingthmu jong kane ka society ka long ba kum ki khun kristan, ki briew kiba la tip ïa ka jinghikai ka ktien u Blei, kata ka long ban buh ha ka kam ïa kaei ba la hikai bad ïa kaba ngi ngeit, namar u Jisu u la hikai ba dei ban ieid bad ngi ïohi ruh ba u ieid ruh ïa kiba don jingduna ha ki dkhot met, u pynkoit ïa kiba matlah, u pynïaid ïa kiba dkhoh, u hikai ruh shaphang u nong samaria ba bha, hateng hateng, ngi ngeit ïa kiei kiei baroh, hynrei ngim lah pat ban buh ïa ki ha ka kam (keep in practice) na kata ka daw ka don ka jingduh nong kaba khraw, ïa ngi kiba tip bad kiba ngeit ïa ki jingshisha.
La pynshai ruh ïa ka jingmut ‘Ephphatha’ ka dei ka ktien kaba la thoh ha ka gospel u Markos, ha kaba u Jisu u la kren ïa kane ka kyntien “Ephphatha’ kumta ki bym lah ban kren ki la lah ban kren, ki bym ïohsngew ki la ïohsngew, ki bym ïohi, ki la lah ban ïohi pat, kumta ngi shim ïa kane ka ktiem, kum kata ka ban ai jingkyrmen ïa kiba don jingduna ha ki dkhot met, ngi ainguh ïa u Blei ba ngi la lah ban ïaid kumne dei lyngba ka jingiarap ka jong u Blei, ngi khot ïa baroh ki paralok kiba don hapoh ka district bad kito kiba shabar ba kin ïa snoh kti lang bad ngi ba ngin ïoh ban kner shisha ïa ki jingïarap sha ki hymmen, ki para jong ngi kiba don jingduna ha ki dkhot met”
La bynrap ruh da kaba ong “Ha ka jingshakri, katba ngi dang im ngi dei ban shakri, namar lada ngi leh bha wat ïa iwei iba rit, ngi ngeit ba u Blei u kyrkhu ïa ngi, mynta hangne ngi don kine ki paralok kiba wan ban shim dawai, mynta ngi don tang khyndiat bad ngi dang donkam bha ïaki awareness prokram ha East Jaiñtia Hills District, khnang ba ngin sngewthuh ïa kane ka jingeh, haba ngi ïaid lynti, ka Ephphatha Society, ka la shem ba ka don kawei ka lad ban wanrah ïa ka jingia ieid hapdeng kiwei pat ki para briew bad kumjuh ruh kiba don jingduna ha ki dkhot met, kumta ngi kum ki nongïalam bad ki dkhot jong ka Society ngi la seng sa ïa kiwei kiwei ruh ki jait shlem ai jinghikai ïa kito kiba don jingduna ha ki dkhot met, kum kaba ai jinghikai ha kaba suh jaiñ bad ha ka put ka tem (music), kaba kynthup ka Western Music bad ka tem tynrai (traditional music), ka jingthmu jong ka Society ha kaba ïadei bad kine ki shlem ai jinghikai ka long ba kiwei kiwei ki paralok bad kumjuh ruh kiba don jingduna ha ki dkhot met kin ioh ïa ka lad ban wan shah hikai ha kane ka Centre” “Ngi sngew kmen ba kumba ngi thmu ka la ong, ha kaba mynta ka kane ka kam suh jaiñ, kiba wan shah hikai ki la don haduh 35 tam, ha kaba 7 ngut na ki, ki dei kiba don jingduna ha ki dkhot met, barabor ki ju ong ba haba ki don ha kane ka centre, ki sngewthuh ba ki long shisha ki briew kiba kordor, namar ba ki ïoh ïa ka jingialong paralok lang bad kiwei kiwei kiba don ha ka Centre, ki ïoh ban rakhe sngikha, ka Society hi ka sngewkhia ban khot ïa ki da kiba anna, mynta ngi dang wad da kawei ka kyntien ka ba sngewtynnad ban khot ïa ki, kaba long kumba kdup ieid lang ïa ki khnang ba ngin ïoh ban rah ïa ka burom jong ki”
“Ngi ainguh ïa u Blei, ba ha kane ka jingshakri jong ngi, ngi ïoh ban ïakynduh bad u Dr S.Syiem, uba na ka San ker, kane ka dei ka jingthmu ka jong u Blei, u wei na ki nongshong shnong uba na Ladrymbai, u dei uba la shu ïaid wir, ka kmie jong u ka thiah pang, namar ka don ïa ka jingpang ïap shiliang, u pat bapli u don ka jingduna ha ka bor pyrkhat, kumta u la shu shang sha surok, um sngewthuh ïala ka jingim, kumta ngi kum ka Society haba ngi ïohi ïa kane, ngi la rah ïa u sha San Ker bad kyrpad ïa i doctor Syiem ba in ïarap bad da ka jingieid jong u doctor la buh ïa u ha Sanker, u la don mynta ha sanker ha ka rukom kaba bit ba biang bha, ryngkat ka jingsumar, ki doctor bad ki nongtrei jong ka Sanker” bynrap u bah Sapuh.
U bah Sapuh, u la ai ka jingkhubei ïa u Doctor Syiem lem bad ki nongtrei jong ka Sanker kiba la ïa wan lang sha kane ka prokram.
Na ka liang u Dr S.Syiem, uba dei u Director jong ka San Ker, u la ïathuh ba Ka sanker ka la don naduh u snem 1990, ngi la seng da ka jingieid, da ka jingkyrmen, ngi ïohi ba ki briew kiba don jingshitom kaba ktah ïa ka bor jingmut jingpyrkhat, bunsiem ka imlang ka sahlang ka kyntait, ha kato ka por, saw phew snem mynshwa ym pat don jaka sumar kaba biang ki la shu shah set hapoh along (jail), ym dei ba ki leh kam sniew, hynrei ba ki pang, ki briew kiba shah ktah ha ka jingshitom ha ka met ka phad, ka suk bha ban sumar, ki bun ki jaka sumar ruh, ym don jinglehraiñ, hynrei ki briew kiba shah ktah ha ka jingmut jingpyrkhat bunsien ki shah kyntait na ïing ruh, phi lah ban sngewthuh, haduh katno ka jingjynjar ka mynsiem jong ki, te ngi ruh ngi dap da ka jingsngewkhia namar ba ym don jaka sumar na ka bynta jong ki, kaba kongsan eh ha kaba ïadei bad ki briew kiba don ïa kane ka jingpang, ka dei ban ai ka jingieid, ka pyrthei kam ieid ïa ki, hynrei ngi pyrshang ha San Ker ban pynpaw ïa ka jingieid ka jong u Blei, ïa ki briew kiba don kane ka jingshitom”
Ha kajuh ka por, u Dr Syiem u ynshlur ïa kiwei kiwei ruh ba kin wan shakhmat, ym dei ba lehraiñ bad ong ruh “ngi ai jingkyrmen ïa ki briew, wat u Lasaros uba la iap saw sngi ha jingtep ruh u dang lait im, te ki briew kiba pang na kane ka jingpang ruh ki bun kiba la ïoh biang ïa ka jingim kaba pura”
U la pynshai ruh ba, kane ka prokram mynta ka sngi ka dei ïa kito kiba don ïa ka jingpang kaba ktah ïa ka jingmut jingpyrkhat.
Ïa ka prokram la pynïaid da u Vice President jong ka Society, u bah H.Bang, la ïoh jingkren ruh na u Assistant Secretary jong ka Society, u bah Markos Ryngkhlem.
Ki nongshim dawai, kiba don jingduna ha ki dkhot met bad kito kiba don jingduna ha ka pyrkhat pyrdain, ki la wan na ki shnong bapher bapher kum na Sohkymphor, Iongkaluh, Tuber, Rymbai, Sakhain, Jalyiah, Nongthyme, Wapung, Musniang.