Syier mynsiem ki nongrep ka Mukroh ban leit lyngkha, pynsngew ka HFU ha u DC

0

Shillong, ïaïong, 05: Ki nongïalam jong ka Hill Farmers Union (HFU) ha ka sngi Baar ki la pynsngew ïa ka jingeh jong ki nongrep ka shnong Mukroh, West Jaiñtia Hills District ha u Deputy Commissioner jong ka West Jaiñtia Hills District ba un ai jingïada ïa ki nongrep kiba don hapdeng ka jingsyier mynsiem na ka jingshah pyndik ha ki Pulit Assam ha ka por ba ki leit sha ki lyngkha ki risai manla ka sngi.
Kane ka jingleit pynsngew jong ki nongïalam ka seng hapoh ka jingïalam jong u General Secretary u Bah Allfondbirth Kharsyntiew bad u President ka HFU West Jaiñtia Hills u Bah Mutshwa Thabah ha Deputy Commisioner ka long hadien ka jingïakynduh markhmat bad ki nongrep ha ka shnong Barato bad ha ka shnong Mukhroh ha ka 1 tarik mynta u bnai.
Ha kaba ïadei bad kane, na ka liang jong u Deputy Commissioner u la kular ba un sa ïakren thawlad ban ïada ïa ki nongrep jong ka shnong Mukroh kiba dang don hapdeng ka jingsyier mynsiem.
Kum ban shu pynkynmaw hangne, ha ka ha ka step jong ka 22 tarik, Naiwieng, 2022 ki Pulit Assam bad ki nongap pahara khlaw jong ka Sorkar Assam ki la synreit kuli naphang ïa ki paidbah ha ka shnong Mukroh, West Jaiñtia Hills District ha kaba san ngut ki nongshong shnong Pnar jong ka shnong Mukroh ki la kyllon ïap hashen bad kynthup ïa uwei u Pulit pahara khlaw jong kaSorkar Assam.
Kane ka jingjia ka la pynshong syier haduh katta katta ïa ki paidbah jong ka shnong Mukroh kat haduh kine ki sngi namarba ki Pulit Assam ki la shah pynskhem ïa ka Border Out Post ha Mukroh hadien ka jingshah wiang dien hadien katei ka jingjia.
Dang shen u Myntri Rangbah ka Jylla Assam u Himanta Biswa Sarma u la kam hapoh ka Iingdorbar Thawain jong ka Jylla Assam ba ka shnong Mukroh ka dei kaba dang hap hapoh u pud u sam jong ka Jylla Assam katba u Myntri Rangbah ka Jylla Meghalaya u Conrad Kongkal Sangma u la pynskhem ba ka shnong Mukroh ka dei kaba dang hap hapoh u pud u sam jong ka jylla Meghalaya.

Leave A Reply

Your email address will not be published.