Shillong, Ïaïong 05: U Bah Paul Lyngdoh, Myntri ka tnad Tourism bad kiwei de ki tnad, u la pynpaw ka jingangnud ban don ki jaka ba kyrpang ban ïaid beit tang ki briew bad ban lait na ka jingkyllut shkor na ka jingpynpah horn ki draibar.Ïa kane u Bah Paul u la pynpaw ha ka por ba leit jurip ïa ka thaiñ Khyndailad ryngkat ki Pulit bad ki ophisar ka sorkar jylla. U Myntri uba la ïaid kjat na ki jaka ba pdeng jong ka Khyndailad, u la ïaid ruh na ka jaka ba ju ïaid paidbah bad kaba ju don ki nongshong die jingdie ha madan, kaba ha ki snem mynshuwa ym ju shah ban ïaid kali. Hynrei kaba dang kine ki snem baladep la pynlong ruh ka jing9aid kali ba Khyndailad ban mih sha Dreamland Cinema Hall shaduh Umsohsun.
Haba ïakren bad ki nongthoh khubor, u Bah Paul u la ong ba ka jingbuh ban don ki jaka kiba ïaid beit tang ki briew kadei kaba don ha kiwei kiwei de ki jylla jong ka ri India. Ka daw ba la buh kumne ka long ba ki briew kin ïoh ban ïaid da ka jingkylluid mynsiem ban lait ruh na ki hum hum ham ham jong ka jingbyrthen ki kali, ka jingpynwit jong ki kali bad khamtam eh ka jingpynpah horn ki draibar kaba la long shisha ka jingwit ïa ki briew wat tang ban ïakren ruh.
U la pynpaw ba ha kaba leh ïa kane ki lah ban don jingwit ne ki jingeh, hynrei ka sorkar kan hap ban pyrkhat ïa ka jingeh jong kiba bun ba lang, ym dei ka jingeh tang jong ki katto katne ngut.Kane ka jingthmu ban pynlong ïa ki katto katne ki jaka ban ïaid tang da ki briew kadei kaba la mih hadien ka jingïalang jong kiba bun ki tnad treikam jong ka sorkar kaba la long ha kine ki sngi kiba ladep.
