Shillong, Naiwieng 15 : Ka Meghalaya ka la ïoh ban khur ïa ka nam lahduh lane kum ka Overall Champions ha ka lympung Athletics jong ka 2nd North East Olympic Games 2022 hynne ka sngi Ba-ar.
Ka Meghalaya ka la ïoh ban khur haduh 15 tylli ki takma ksiar nalor 9 tylli ki takma rupa bad 17 tylli ki takma rnong kaba lada kheinlang baroh ki la poi 41 tylli. Kadei tang kane ka jingïalehkai na ka bynta ka Meghalaya kaba dei ka trai jaka ban khur bun tylli ki takma ksiar ha katei ka lympung NEOG 2022 ba pynlong ha kane ka jylla.
Kumban shu kdew hangne, ba ka NEOG kaba nyngkong kaba long ha Manipur ha u 2018, ka Meghalaya ka la ïoh ban khur tang kawei ka takma ksiar kumta ban mih madan biang hadien saw snem ka la long kaei kaei kaba khraw na ka bynta ka jylla bad ruh ka jingjop bad ka burom kaba khraw ïa baroh la ka long naduh ki nongïalehkai, ki coach, ka sorkar jylla bad ruh ïa ka tnad Ïalehkai khamtam eh ïa ka Meghalaya Athletics Association nalor kiwei kiwei ki kynhun.
Ha katei ka thup ïalehkai, ka Assam ka la wan ba ar da ki 12 tylli ki takma ksiar, 6 tylli ki rupa bad ar tylli ki rnong katba ka Manipur pat ka wan ha ka kyrdan kaba lai da ki 10 tylli ki takma ksiar, 14 tylli ki rupa bad 9 tylli ki takma rnong.
Ka Nagaland pat ka la ïoh ban khur 9 tylli ki takma ksiar, saw ki rupa bad 10 ki rnong katba ka Tripura ka khur ar tylli ki ksiar, 7 tylli ki rupa bad 7 tylli ki takma rnong. Ha kawei pat ka liang ka Arunachal Pradesh ka la ïoh ban khur kawei kawei ka ha baroh ki thup nangta ka Sikkim pat ka ïoh ban khur san tylli ki takma rupa bad kawei ka rnong bud sa ka Mizoram kawei ka takma rupa.
Na ka bynta ka Meghalaya kum ka kynhun trai jaka ka duna sa saw tylli ki takma ksiar ban don ha ka kyrdan kaba lai hadien ka Arunachal Pradesh ha ka thup kiba ïoh khur takma ha ka NEOG 2022 tad haduh ka por 9:20baje janmiet.
Kumba ka long haduh mynta ka Arunachal Pradesh ka ïoh ban lamkhmat da ki 38 la 34 tylli ki takma ksiar ïa ka Meghalaya, katba ka Assam pat ka lamkhmat ha ka kyrdan kaba nyngkong da ki 78 tylli ki takma ksiar bud pat sa ka jylla Manipur da ki 75 tylli ha ka kyrdan kaba ar.
Ïa ka khusnam Best Athlete na ka bynta kiba 20 snem shajrong la ïoh da u Neiketoulie Belho ka Nagaland uba la khur ïa ka nam lahduh ha ka 100m bad ruh ha ka Long Jump. Ha ka thup ki kynthei ba 20 snem shajrong pat la ïoh da ka N Chaoba Devi jong ka Manipur, kaba khur takma ksiar ha ka 800m bad 1500m. U Arupjyoti Gogoi jong ka Assam u la ïoh pdiang ïa ka khusnam kum u nongïalehkai ba kynsai tam ha ka thup kiba hapoh 20snem hadien ba u la khur takma ksiar ha ka 100m bad 200m. Katba ka Niansai T jong ka Nagaland ka la shah jied kum ka nongïalehkai ba kynsai tam ha ka liang ki kynthei ba hapoh 20 snem hadien ba ka la jop ïa ka jingïakob mareh ba 800m bad 1500m.
