Shillong, Naiwieng 15 : Ka Meghalaya bad Mizoram kidei ki ar tylli ki jylla kiba la poi shaduh ka kylla kaba khatduh ban ïa knieh ïa ka nam lahduh ha ka phutbol U-21 jong ka 2nd North East Olympic Games 2022, kaban long ha ka 16tarik mynta u bnai ha madan MFA Polo, Shillong ha ka por 1:00 baje mynsngi.
Na ka liang ka Meghalaya Football Association (MFA) ka pyntip ruh ba na ka daw ka jingduna ki jaka shong ha jaka peitkai jong ka madan MFA Turf Polo ground, Shillong, la buh ruh haduh lai tylli ki LED giant screen ha Shillong Sport Association (SSA) Football Ground – I, Polo khnang ba ki paidbah kin ïoh ban peit Live beit hangto ia ka jingialehkai final hapdeng kitei ki ar kynhun.
La pyntip ruh ba ia ki jaka die tiket yn plie naduh ka por 11:00 baje mynstep bad kumta la bthah ia ki paidbah ba kin shong noh ha ki jaka jong ki naduh ka por 12:00 baje mynsngi.
La pyntip ruh ba ki nongwan peitkai kin ym ïoh satia ban rah shapoh jaka peitkai ia ki bilor um, ki sikret, jingpruid lane ki siej teh lama, ki jingput, ki jingpynbthei, ki pla kit ne pla laptop, biri, kwai, duma bad ki shyngkom.
Na ka liang ki bor pynïaid ki pyntip ruh ba ïa ki giant screen la buh ruh ha Assam Club, Laban, Polize Bazar, Shillong bad Tura na ka bynta ban pyni live ïa katei ka final football. Nalorkata yn pyni ruh ïa katei ka jingïakhun ha DD Sports Channel bad live stream ha Prasar Bharati Sports Youtube channel lyngba ka : https://youtube.com/c/ PrasarBharatiSports.
