Shaduh lum Mawthadraishan poi ñiah cycle ki nongïakhun North East Olympic

0

Shillong, Naiwieng 15 : Ka surok ba itynnad baroh arliang na Shillong haduh Lum Mawthadraishan ka la sakhi ïa ka jingshim bynta shitrhem jong ki nongñiah cycle na kylleng ka jylla kiba ban shim bynta ha ka lympungbah jong ka 2nd North East Olympic Games 2022, ha kaba ka Manipur ka la ïoh ban khur ïa ka nam lahduh ha ka liang ki shynrang bad kumjuh ruh ha ka liang ki kynthei.
Da kaba beh ïa ka thong kaba 80 kilometer, kane kadei kawei na ki 18 tylli ki jingïalehkai ha ka NEOG 2022 kaba la pynlong shabar jong ka nongbah Shillong ha kaba ki nongñiah cycle ki ïoh ruh ïa ka kabu ksiar ban ïohi ïa ki sawdong sawkun bad ki surok kiba bha naduh dang ngir ha kane ka sngi Ba-ar.
Ha ka jingïakhun, u Konthoujam Bishan Singh na Manipur u la ïoh ban khur ïa ka nam lahduh da kaba pyndep ïa katei ka thong ha ki 2kynta, 28 minit bad 25 sekhon ban khur ïa ka jingjop ha ka liang ki shynrang (Open men’s category). Ïa ka takma rupa pat la ïoh da u Tajum Dere na Arunachal Pradesh uba poi slem tang hadien shi minit kata ha ki 2.29:19 sekhon katba u Kevinjohn Khyllait jong ka Meghalaya pat u la ïoh ban khur ïa ka takma rnong da kaba pyndep ha ki 2:30:45 sekhon.
Ha ka thup ïakhun jong ki kynthei pat, ïa ka nam lahduh la ïoh ban khur ïa ka Naorem B Devi jong ka Manipur kaba la pyndep ïa ka thong ha ki 2:57:18 sekhon. Katba ïa ka kyrdan kaba ar la ïoh da ka Arunachal Pradesh lyngba ka Lindum Kia Kia kaba pyndep ha ki 3:01:56 sekhon bad ka Thokchom Helen Devi ka la ïoh ban pynbun takma ïa ka Manipur da kaba wan ha ka kyrdan kaba lai hadien ba ka la pyndep ïa ka thong ha ki 3:04:55 sekhon.
Haba ïakren bad u Kevin John Khyllait, uba la jop ïa ka Takma Rnong ha kane ka jingïakop ñiah Cycle, ula ong ba kane kadei ka sien kaba nyngkong eh ba un ïashim bynta ha ka Road Race jong ka Cycling. Hynrei u la pynpaw pat ba u sngewkmen bau lah ban poi ha ka kyrdan kaba lai. U la ong ba u don ki jingeh ha ka por ba ïah Cycle na Shillong sha Mawthadraishan bad kawei na kine ki jingeh kadei ka jingkhriat khamtam ynda poi ha ki thaiñ Kynshi, ha kaba ka la pynshitom ïa u wat ban thep Gear bad wat ban bam jingbam ruh ym ïoh lad namar ka jingkhriat palat. Nangta ynda la kiew sa ïa ka surok ranab jong u Lum Mawthadraishan, u la thait bha bad u la mut ban shong noh namar ka jingthait palat. Hynrei u la ïakhun tyngeh ban poi tad haduh kliar lum syndon.
Haba la kylli kaei kaba donkam haba long u nongïakhun ñiah Cycle, u Kevin, u la ong ba kaba donkam eh kadei ka jinglah ban shah ïa ki jingeh bad ka jingtrei shitom, namar ba khlem kine ka long kaba eh ban ïakhun ha ka jingïakop ñiah Cycle.
Sa kawei pat kaba donkam ka long ban don ki tiar ki tar khamtam eh ka Bicycle kaba ïahap bad ka jong kiwei pat ki nongñiah Cycle, namar kaba u don mynta kam pat dei kaba biang bha. U la ong ba kiwei ki la don da ki tyre tubleless katba ma u pat u dang ñiah da kaba don bad ka tube, kaba ka dor ka long kumba 1.20 lak tyngka katba kiwei pat ki don kaba hapdeng 5 bad 6 lak tyngka. “Nga la rem ha kiba bun ki jingïakhun shabar jylla, tang namar ba ka tyre jong ka Bicyle jong nga, ka puncture noh”, u la ong.
U la ïathuh ruh ba un nang trei shitom nangne shakhmat ban ïashim bynta khamtam ha ki National Level.

Leave A Reply

Your email address will not be published.