Rah ka Jotina Kleiñ bad u Rishanlangki Lynser ïa ka nam Miss bad Mr Ri-Bhoi College
Hapdeng ka jing iphuh iphieng pynkut noh ka Ri Bhoi College ïa ka 36th Annual College Week
Nongpoh Naiwieng 12: Ki Samla pule jong ka Ri Bhoi College kawei naki shlem ai jinghikai kaba la rim haka them Ri Bhoi hapdeng ka jingiphuh iphieng mynta ka sngi kala pynkut noh ïaka program lehkmen bala tip kum ka 36th Annual College Week jong ki samla pule bala pynlong ha phyllaw katei ka college.
Ïa katei ka prokram lehkmen ki samla pule ka Ri Bhoi College la wan ban pynhap pyrda noh da u Bah Mayral Born Syiem MLA ka Nongpoh kum u kongsan haka jing donlang u EC Benny Vice Principal ka Ri Bhoi College, ki nonghikai lem bad ki samla pule.
Naka Liang ki samla pule ha katei ka sngi kila shimbynta ruh haki jingshad bad jingrwai bapher bapher bad kumjuh ruh ka jingïakop Miss and Mr Ri Bhoi College kaba la pynshongshit bad pynkhih met ïaki samla pule katei ka College.
Haba kren ha katei ka sngi ka jingpynkut noh ïa katei ka College Week ki samla pule ka Ri-Bhoi College naka liang u Bah Mayral Born Syiem u la pynpaw ba ka Ri-Bhoi College ka dei kawei naki shlem ai jinghikai kaba paw bad katba dangmih ki sngi katei ka shlem ai jinghikai kala nang kiew bad roi sted haka jingdon ki khynnah bad ki samla pule ban pynphriang ïaka jingnang jingstad haka thaiñ Ri-Bhoi baroh kawei.
U la ong ruh ba nalor ka pule puthi ki samla pule ki donkam ruh ïaka por lehkmen ban ban pyn pyngngad ïaka jingmut jingpyrkhat, hynrei kim dei pat ban klet ban im bad lehkmen haka rukom kaba don akor bad kaba pynsngewbha ïaki kmie ki kpa ban ïaid ruh ryngkat bad ka jingpule ba kin long ki samla kiba tip briew tip blei.
U la sneng bad kyntu ruh ïaki samla ha katei ka sngi ba kin shimkhia bad minot ïaka jingpule bad kiar naki jingmlien bad ki jingdih ba sniew kiba ktah ïaka bor met bad kumjuh ruh ka bor pyrkhat, hynrei ban pynkhlaiñ bad ban pyndap ïaki jingmut jingpyrkhat ki ban tei ïaka longbriew manbriew khnang ba shisien ka sngi kin sa long ki khlur kiba tyngshaiñ haka jingim jong ki.
Ha katei ka sngi naka liang u Bah Mayral Born Syiem u la aiti ruh da ki shuki bad Jersey sha ki nongïalam jong ka Ri-Bhoi College Students Union naka bynta ka jingdonkam jong ka College.
Ha ka jingïakop thei bhabriew bad ryngkynsai jong ka Ri-Bhoi College la rah da ka Jotina Kleiñ ïaka nam Miss Ri-Bhoi College bad u Rishanlangki Lynser ïaka nam Mr Ri-Bhoi College.