Nongpoh, Naiwieng 12 : Shibynta ban ai mynsiem ïaki samla pule ban kin dang kiew shaphrang ban bteng ïaka jingminot haki jingpule ba kham shalor, ka Synjuk ki Seng Samla Hynriew Shnong ba kynthup ïaka Shnong Sohlait, Nartap, Langpadon, Sohlait Thymmai, Lumkya bad Umsawnoldhi haka sien ba nyngkong eh mynta ka sngi kala pynkup burom ïa kumba 39 ngut ki samla pule kiba pass haki eksamin bapher bapher naduh SSLC haduh kiba la pyndep ïaka Graduate bad Post Graduate da ka Academics Excellence Award 2022.
Ha katei ka jingïalang pynkup burom la pynlong ha Sohlait Rim Secondary School, bala wan ban shim bynta da u Bah Jason S Mawlong MLA ka Umsning kum u kongsan, Bah Stephan Maring kum u symbud kongsan, haka jingdonlang ki riew Rangbah na katei ka thaiñ naduh ki nongialam Shnong, Bah K Shadap Chairman ka Synjuk 6 Shnong, ki nongïalam ka Synjuk ki Seng Samla ba kynthup ïa u Samla Vincent Makri Adviser, Samla Rishotbaskhem Lapang President, Sainkupar Syngkli Secretary bad kiwei kiwei ki riew Rangbah ryngkat ki samla pule kiba la ioh pdiang ïaka khusnam bad ka jing pynkup burom.
Naka liang u MLA u la ai mynsiem ïaki samla pule ba kin dang leh bha shuh shuh haki jingpule ba kham shalor bad ban long ki samla kiba don akor, kiba tip briew tip Blei khnang ba kin poi sha ka thong kumba ki angnud haka jingim jong ki.
U la ai mynsiem ruh ïa kitei ki samla pule ba kim dei ban ap khmih lynti tang haka kam sorkar hynrei ban pyrshang ban ieng hala ki jong ki kjat kumba ka sorkar ka pynmih bun ki lad jingïarap naka bynta ki samla.
