Plie u Bah Hametson Dohling ïa ka ïing skul thymmai ka Lyngkien Mylliem Govt L P School

Shillong, Naiwieng 12 : U Myntri ka tnad pynroi nongkyndong, uba long ruh u MLA ka Mylliem Constituency, u Bah Hamletson Dohling mynta ka sngi u la plie ia ka iing skul ba thymmai jong ka Lyngkien Mylliem Government Lower Primary School.
Haba ai jingkren ha kane ka sngi u Bah Hamlet Dohling u la ong ba hadien 58 snem ka jingiaid lynti jong kane ka skul la lah ban pynurlong ia ka jingangnud bad jingdonkam jong ki nongshong shnong ha kaba la ioh ban shna ia ka iing skul kaba thymmai, u la pyntip ruh ba ia kane ka iing skul la tei ha ka jinglut kaba 37 lak tyngka. U MLA u kyrmen ruh ba lyngba kane ka iing skul kan wanrah ia shibun ki jingmyntoi ïa ki nonghikai bad khamtam ia ki khynnah skul kiba long ka lawei jong ka shnong bad ka ri hi baroh kawei. U la pynpaw ruh ba kum u nongmihkhmat u la shim khia ban pynioh kumba 3 klur tyngka ban pynbit pynbiang ia ki jingdonkam haba iadei bad ka pule puthi hapoh ka constituency.
U Bah Hamlet u la ai khublei ruh ia ki nongpyniaid shnong kiba la ai kylluid mynsiem ia ka jaka ban tei ia kane ka iing skul, ia ki nongpyniaid lem bad ki nonghikai jong ka Lyngkien Mylliem Government L P School kiba la iatreilang ban pynurlong ia kane ka jingkwah jong ki paidbah la bun snem mynta.