Ïoh jinghikai ki khynnah skul kumno ban long ki nongïalam lyngba ka LTS

0

Shillong, Naiwieng, 12: Ki khynnah skul kiba wan na ki skul bapher bapher jong ka nongbah Shillong ki la ïohlad ban ïashim bynta ha ki jinghikai bad ki jingbatai ban long ki nongïalam shisien ka sngi lyngba ka Leadership Training Service, Shillong Region.
Ka jingai jinghikai sha ki khynnah skul da ka LTS, Shillong Region ka long halor ka phang “Leading Lights” bad ïa kane ka lympung ai jinghikai la tip kum ka Teen Ductus Students Leadership Conclave kaba la long ha Sacred Heart Theological College, Mawlai, Shilong ha ka 6 tarik u Naiwieng.
Ha kane ka sngi u MLA jong ka Nongthymmai Constituency u Bah Charles Pyngrope u la long kum u Kongsan ryngkat ka jingdonlang jong u Principal Secretary ka Sorkar Jylla u G.H.P Raju kum u Kongsan bad u G.. Pradesh Pillai uba long u nongai jinghikai jong ka Rotary International.
La sdang ïa kane ka jingai jinghikai sha ki khynnah da ka jingduwai bad ka jingrwai pdiang sngewbha na ki khynnah skul jong ka Holy Child School bad la pynbud sa ka jingpdiang sngewbha da u CMI LTS Coordinator, Shillong Region u Br. John P. Tom bad ka jingthang ïa ka sharak da u Kongsan.
Kane ka lympung ba la pynlong da ka LTS ka long ban plie lad ïa ki khynnah skul kiba dang khie dang san ba kin dup lah ban pynpaw pyrthei ïa la ka sap ka phong kaba ki don khnang ba kin dup lah ban saiñdur kham bha kumno ban long ki nongïalam shisien ka sngi.
Ki don haduh khyndai tylli ki skul kiba la ïashim bynta kiba kynthup ïa ka St. Mary’s Higher Secondary School, ka St. Margareth Higher Secondary School, ka St. Edmunds Higher Secondary School, ka Seven set Annex Higher Secondary School, ka James Memorial School, ka St. Francis School Umbir, ka St. Francis School Smit, ka Holy Child Higher Secondary School bad ka Sacred Heart Girls.
Ki don kumba 350 ngut ki kynnah skul ryngkat lang ki Principal lem bad ki nonghikai.

Leave A Reply

Your email address will not be published.