Ki tamasa tynrai ki dei ka lynti ban pynneh pynsah ïa ka jinglong kyrpang jong ngi: Conrad

2 klur pynbna u CM ban pynitynnad ïa ka jaka shad Wangala

0

Tura, Naiwieng 12: U Myntri Rangbah ka jylla u Conrad K Sangma ha ka sngi Saitjaiñ u la ong ba ki tamasa tynrai ki long ki bynta ba kongsan jong ki jaidbynriew riewlum jong ka jylla bad ki long ruh kum ka lad ban pynphriang ïa ka jinglong kyrpang ki jaidbynriew bad ruh ka lad ban pynneh pynsah ïa ka jinglong kyrpang jong ki.
Haba kren kum u Kongsan ha ka sngi pynkut ïa ka tamasa Wangala ba la ju pyndonkam ban tem 100 tylli ki ksing, u Myntri Rangbah u la ong ba kane ka tamasa kaba kum ka jaidbynriew(Garo) ka pynlong ka pynphalang sha ka pyrthei ba ki dei kiei bad kaei ka jinglong kyrpang jong ki.
“Ka Wangala ka dei ka tamasa kaba ngi donkam ban tyngkai bad pynneh pynsah namar dei lyngba kum kine ki tamasa ba ki long u soh pyni sha kiwei pat ki jaidbynriew ïa ka jaidbynriew jong ngi,” u la ong.
U Myntri Rangbah u la ai ruh ïa ka jingïaroh ïa ka Hundred Drums Wangala Festival Committee kaba la lah ban pylong ïa kane ka tamasa na uwei u snem sha uwei pat bad ba ka jingpynlong ïa ka ruh ka long kaba jop u la ong
Haba kren halor ka jingkongsan jong ka Ktien Nongmei Nongpa, u Myntri Rangbah u la ong ba dei namar ka jingsngewthuh ka sorkar ïa kane ka jingkyrpang jong ka ktien ba ka sa rah ïa ka Resolution ha ka Ïing Dorbar kaba la ïoh jingmynjur ruh ban tyrwa sha ka Sorkar pdeng ban ithhuh noh ïa ka ktien Khasi bad Garo ha ka khyrnit ba phra ka riti synshar ka ri.
U la ruh ba dei namar kane ka daw ba ka sorkar ka sdang ban ai ïa ka khunsam ïa ki nongthoh ba tbit ha ka ktien Khasi bad Garo kum ban pynshlur ïa ki ban ban ai jingithuh ruh ïa u synñiang u bynhei ba ki noh sha u sup u thiar ka thoh ka tar.
Shuh shuh u la ong ruh ba na ka liang ka sorkar ka don ka thong ban ïarap kyrshan ïa ki nongthaiñ nongshna jong ka jylla da kaba ka ïarap baiseng ïa ki bad ka jingplie lad plie lynti ïa ka ïew ka hat ba kin die ïa ka mar ba ki pynmih.
U Myntri Rangbah u la pynpaw ruh ïa ka jingangnud ba ki paid Garo kiba la shong la sah sha kiwei ki bynta ka ri bad wat sha bar ri ruh ba kin wan shim bynta lang sha kane ka tamasa kyrpang ka jaidbynriew Garo bad u la kytu ïa ka Hundred Drums Wangala Festival Committee kan wad lad wad lynti halor kane ka bynta.
Ha kane ka sngi u Myntri Rangbah u la pynbna ruh ïa ka song pisa ba 2 klur tyngka na Meghalayan Age Ltd na bynta ban pynbha bad pynitynnad ïa ka Garo Heritage Village kaba dei ka jaka ban pynlong ïa kane ka tamasa nangne shakhmat ïa kaba yn pyntrei da ka Tnat Jngohkai pyrthei ka sorkar jylla.
Ha kane ka sngi u Deputy Speaker, ka Ïingdorbar Thaw aiñ ka jylla Assam u Dr. Numal Momin u la wan shim bynta kum u Symbud Kongsan bad ha ka jingkren jong u u la pynpaw ïa ka jingsngewnguh ïa ka Festival Committee kaba la khot sngewbha ïa u sha kane ka tamasa.
U Myntri ka tnat PHE ka sorkar jylla u Bah Renikton Tongkhar haba ai khublei ïa ki paid Garo ha kane ka sngi kyrpang jong ki u la pynpaw ïa ka jingsngewkmen ban ïohi ba ki long ka jaidbynriew ba sdang kiew sha kliar ka nam ym tang ha ka jylla hynrei wat kiba sha bar jylla bad bar ri ruh.
Ha kane ka sngi la ïoh ruh ka jingkren na u Chairman ka Wangala Committee u Ronald Rikman Sangma uba la batai shaphang ka jingkordon kane ka tamasa na bynta ki Garo bad ka jingdonkam ban tyngkai ïa ka.
Ha kane ka sngi la wan sakhi la ïa kane ka tamasa da u Deputy Speaker, ka Ïing Dorbar Thaw aiñ ka jylla u Timothy D Shira, u Nongaibuit jong u Myntri Rangbah u Thomas A Sangma, u MLA ka Bajengdoba Constituency u Pongseng Marak, u Deputy Commissioner ka West Garo Hills u Swapnil Tembe ryngkat ki paidbah bah ki nongwan jngohkai pyrthei na kylleng ka ri bad ka pyrthei ruh.

Leave A Reply

Your email address will not be published.