Shillong, Kyllalyngkot 16 : Ka Hynñiewtrep FC ka la ïohrah ïa ka namlahduh hadien ba ka la pynbam da 5-2 pyrshah ïa ka Maduh FC ha ka final jong ka 1st (L) Justine Khongkip, former rangbah shnong(1979-1982) Mawlai Kyntonmassar Memorial Football Tournament Mawlai Open ba la pynïaid da ka ïing ka sem jong ka kur Pathaw ha ka jingïatrei ryngkat bad ka Dorbar Shnong Mawlai Kyntonmassar ba la ïalehkai ha madan shnong ha Kyntonmassar ha ka sngi Saitjaiñ ka 14 tarik u Kyllalyngkot, 2023.
Kum ka Lahduh ka Hynñiewtrep ka la ïohrah ïa ka song pisa kaba 20 hajar tyngka ryngkat ka trophy bad ka Maduh 10 hajar tyngka ryngkat bad ka trophy.
Haba phai sha ka jingïakhun ba pynïalehkai mar hynñiew ngut shilliang, saw kol la ïa thep ha ka kyllastep bad lai kol ha ka kylla miet.
Ha kane ka sngi la sam ruh ïa ki khusnam shimet, u Justine Hadia u la ïoh khur ïa ka nam best player, katba ka nam Best goalkeeper ka la leit sha u Ïaidon Warlarpih bad Top scorer la ïoh khur da u Nevielle Majaw.
Ïa ka trophy sha ka Lahduh la sam da Bah Wanseng Jyrwa, working president ka United Democratic Party kum u kongsan, katba sha kaba wan baar la sam da u rangbah shnong ka Mawlai Kyntonmassar u Dr. Marco Mitri kum u symbud kongsan ha ka jingsakhi ryngkat lang da ki bahaïing hasem jong ka kur Pathaw, ki riew rangbah, ki longkmie bad kiwei kiwei.
Ha kane ka sngi la ïoh ïa ka jingkren na Bah Wanseng, uba la pyrto ïa ka longïing Pathaw kaba la pynlong ïa kane ka lympung ïalehkai bad u kyrmen ba kin ïai bteng ban pynlong ïa kane ka phutbol ha ki snem kiban ruh.
Ha kane ka final la ïoh ruh ïa ka jingkren na Dr. Marco, na bah Marseile Kharbani, na rangbah shnong barim Bah Darius Syiemiong bad kiwei kiwei
