Ka VPP kan nym ailad da lei lei ïa ka bamsap, kiba bam kin shah pynshitom: Ardent

Shillong, K’lyngkot 16: Ka Seng VPP ka la kular ba lada ki paidbah ki ailad ïa ka Party ha kane ka elekshon 2023, kan wanrah ïa ka jingsynshar kaba khuid ba suba, ka ban nym ailad da lei lei ruh ïa ki kam bamsap bad kan tohkit ruh ïa ki kam bamsap jong kane ka sorkar ba mynta bad lada lap ïa ki briew ba donkti yn pynshitom katkum ka aiñ.
Haba kren ha ka jingïalang paidbah ha Madan Polo, ha kaba la poi da ki hajar ngut ki paidbah, u Bah Ardent Miller Basaïawmoit, u la ong ba ka Party VPP ka la mih namar ba kiwei pat ki Seng Riewlum kim shym la lah ban leh ïa la ka jong ka bynta ba kidei ban leh, hynrei baroh baroh la shu ïabeh lut ïa ka rongphong bad la shu ailad ïa kyrñiom lang ha ki kam bamsap.
“Ka VPP kan nym aili satia ïa ka jingbamsap bad lada lap ïa kiba bamsap ruh, ngin pynshitom katkum ka aiñ”, u la ong.
Ha kaba ïadei bad ka jingtreikam ki DSC, ka MPSC, u Bah Ardent u la ong ba ka VPP kan wanrah ïa ka jingtreikam kaba khuid kaba lait na ka jingtuklar jong ki Politician, khnang ba kito kiba dei hok ban ïoh ïa ka kam katkum ka jinglah jong ki, kin ïoh.
U la pynshai ruh ba ka jingthmu ban pynlong ia kane ka jingialang ka long ban pyni sha kito kiba ju ong ba khlem ka pisa ym myntoi ban ialeh elekshon. Kawei pat u la ong ba kadei ban pyni sha kito kiba khein troiñ ïa ka VPP ba kam poi shano shano ruh. Hynrei ka jingmih u paidbah ban wan sha kane ka jingialang, ka pyni ba ym long ban ïalehkai bad kane ka Party kaba duk, kaba la kyrshan da u paidbah uba ieit ia ka ri bad ka jaidbynriew ym tang na ki rymmiang shyntur, hynrei kiba ieit naduh ka tyllong ka dohnud.
Shuh shuh u Bah Ardent u la ong ba bun ki Party ha kine ki sngi ki la shu kop ba kin jop beit ha kane ka elekshon 2023, da kaba pynïasyriem ïa ki kum kito ki nongri syiar kiba shu tip ïa ki syiar ba ki ri bad aibam hi, katba ïa ki syiar khlaw pat kim tip katno ki don. “U paidbah babun mynta u long kum ki ‘yiar khlaw u bym shah set hasem, hynrei uba laitluid ban jied ïa uno u kyrtong, ïa kano ka Party ban jied”, u la ong.
U la wer ïa kito kiba shah set sem ba kin kynthih noh katba dang biang ka por, namar lashai da ym lah kynthih shuh ïoh ki babe kylla hadien.
U la ong ruh ba ka VPP ka la jied bad ailad ïa ki Samla kiba ieit ïa ka jaidbynriew ba kin mih shakhmat ryngkat ka jingbtin lynti ïa ki ba kin ïaid ha ka lynti kaba dei bad ba kin shakri ïa ki paidbah da ka lynti kaba khuid bad kaba shisha, ym ban ïalam ne pyndonkam bakla ïa ki.
U President ka VPP u la ther tyngeh ïa ka sorkar MDA kaba la shu kop sarong kat shaba leit, hynrei kiba bun ki jingangnud jong u paidbah pat kam shym la lah ban pyndep. U la ong ba ki la shu kop ba ka la leh na ka bynta ka jylla, hynrei kadei kajuh ka sorkar kaba la map ei ïa ki bai ding elektrik jong ka jong ka Kompeni Sai Prakash ha Byrnihat haduh 129 lak tyngka. Nangta ka JUD Cements ha Jaiñtia Hills kaba ka bai ding elektrik ka long haduh 2000 lak tyngka haduh mynta kam pat siew. Hynrei ban da dei ïa ki paidbah pat poi bai ding elektrik 5 ne 10 hajar la shah ot ka ding elektrik. Nangta ka kular ban weng ïa u Khar Metor ha Them ïew Mawlong, hynrei wat haba la pynbiang ïa ki ïing ki sem na ka bynta jong ki ym shym la lah ban weng haduh mynta.
Shuh shuh u la ong ba ba ka VPP ym tang ba kan wanrah ïa ka jingsynshar khadar kaba khuid ba suba, hynrei kan pynlong ruh ïa ka jylla kaba suk kaba saiñ bad kaba ai ka jingkmen ïa ki paidbah.